美國大選前夕 「紫天椒」Chloe Moretz出櫃撐賀錦麗 奧斯卡提名墮胎短片免費睇

美國時間星期二係總統選舉日，雖然提前投票一早展開，但兩位候選人－共和黨嘅特朗普同民主黨嘅賀錦麗都當呢個周末係最後衝刺期，雙方陣營當然同樣搏命拉票。

荷里活唔少藝人都表咗態支持賀錦麗，最新一位係《勁揪俠》女星「紫天椒」Chloe Moretz。Chloe撐賀錦麗，唔止出post，直情出櫃！佢個post指自己喺提早投票投俾賀錦麗，認為賀錦麗可以保障女性身體自主權，而且作為女同志（gay woman）佢相信多元性向人士需要法律上的保障，並呼籲選民計劃好幾時去投票。Chloe曾經同碧咸大仔Brooklyn拍拖4年，近年同model Kate Harrison拍拖，但從未就取向表態。

Chloe提到嘅女性身體自主，正正係今屆大選選民取態關鍵之一，因為唔少女性擔心特朗普再上台的話，可能令墮胎政策再度收緊。而以墮胎為主題、喺今年初入圍奧斯卡最佳實況短片嘅作品Red White and Blue，製片人決定將短片上載到youtube俾觀眾免費睇。

Red White and Blue講述一位喺阿肯色州嘅單親媽媽，要穿州過省去到隔離嘅州份搵辦法墮胎。唔好睇少套戲係短片，去到中後段嘅劇情反轉，相當有後勁。導演Nazrin Choudhury回應，認為將Red White and Blue公開分享，係希望推動社會知道，今次投票關乎女性未來。

至於被視為會保障女性嘅賀錦麗，周六突然現身老牌節目Saturday Night Live(SNL），出現喺由Maya Rudolph模仿佢嘅趣劇，以本尊身份現身，仲以對白「你至少識開門」，明串早排揸垃圾車拉票但唔識開車門嘅特朗普。不過賀錦麗現身SNL就引起播放節目嘅電視台NBC有冇給予公平曝光時間俾特朗普嘅爭議。而NBC就喺周日晚播NASCAR賽車期間，俾咗90秒廣告時間特朗普一方，同賀錦麗現身SNL嘅時長差唔多，似乎係為咗補鑊。

更多電影文章

焚城／阿諾拉／邪Mall／成為星星的少女︳電影LOL 今期睇咩戲

《機動戰士高達》荷里活真人版電影 講足6年終於落實導演人選 傳明年開拍︳電影LOL

許光漢盛傳拍《尚氣2》服兵役抽空苦練英文 新角色「鐵拳」就係佢？︳電影LOL

《里斯本丸沉沒》因不符合規定被DQ 無法代表中國角逐奧斯卡最佳國際電影︳電影LOL

《風林火山》盛傳於橫店推介會播預告 外媒消息指2025年上半年上畫︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！