Mayanne小喇叭丨細細粒帶貨一晚曾賺800萬大爆辛酸事 帳號被封曾寫悔過書

陳嘉佳（細細粒）近年轉戰內地發展擔任「吃播主」帶貨，體重高峰期曾達287磅嘅佢去年因健康響起警號積極減肥，成功於半年搣甩121磅，身形明顯縮水與昔日判若兩人惹起熱議。昨日（4日），麥美恩同曾展望主持嘅TVB節目《Mayanne小喇叭》就播出細細粒擔任嘉賓「直播帶貨搵真銀？」一集，同場更有梁競徽及知識型美容直播主Yoko Tsang，三人於節目上分享內地及香港直播帶貨趣事及辛酸事。

細細粒透過直播帶貨闖出名堂，高峰時期曾一晚賺800萬，但原來都遇過唔少損手事件，細細粒坦言初出道時連續3個月每場僅60幾個支持者，反應冷淡，又指曾遇到有人「頂爛市」令生意額大跌四成以及貼錢情況：「一盤2,000萬嘅貨，可以最後蝕錢嘅。最常見嘅例子『今日我畀你充值電話費，充100蚊只收你95蚊』，嗰95蚊我要貼架，咁做呢一個action為乜？咪令到我個GMV（成交額）可以到數。我試過60幾蚊嘅朱古力每盒只賺2個幾，啲錢真喺一毫子賺番嚟。」

細細粒又透露直播辛酸事，坦言為跑生意額，平均每年喪食至少400隻大閘蟹，食到有陰影，又曾喺極惡劣環境下直播，及後嘔足八粒鐘：「個棚裏面平均 45 度，我喺入面嘔咗八個鐘！因為嗰度農村嚟，供電唔夠，係連風扇都唔吹得。」不過，最恐怖都係見過過萬隻蚊喺眼前「橫飛」及幾千隻「珍寶蟲」飛來飛去嘅情況。談到直播帶貨陷阱，細細粒表示試過帳號被封，需要寫悔過書：「我人生第一次寫悔過書，嗰次我直播時唔知咩事冇咗，話我個account要被封28日，呆咗，我哋全公司連老闆係咁打電話問點解。」原因原來係細細粒喺直播期間唔小心展現違規圖片，除咗寫悔過書，最後需時逾半年，流量先至回復正常。

梁競徽分享試過直播促銷提子，喺烈日當空下又唱又跳，結果熱到連「底褲都濕埋」，又透露於入行初期曾「精神分裂」，連日常生活都講咗帶貨字眼：「例如做直播帶貨係唔可以講錢嘅，要講米，搞到我去餐廳賣單都問幾多米。」；Yoko就表示香港直播或為廣告做boosting亦有規範。細細粒和梁競徽接受訪問時表示透過直播賺錢認真唔容易，梁競徽直言要多謝TVB過去嘅磨練，先可以勝任帶貨工作：「直播好睇但唔易做，辛苦程度係一般人睇唔到」，細細粒則指對自己要求高，所以做直播要付出嘅努力非外人能夠想像：「以前成日覺得拍戲啊、入TVB啊，人哋都會講句『拍戲5年，成長10年』，但直播你做3年，成長唔至15年，睇吓你要求幾多，如果你係要求呢件事我做我成功嘅話，我諗付出嘅努力係等於你經營一盤生意無分別。」更直指而家成個工作模式係生意行先，暫時都係專注帶貨。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！