周啟生疑批評楊千嬅擔任《中年好聲音》評判「唱歌唔叻點做評判」 強調自己對事唔對人

音樂人周啟生早前對後輩多番批評惹起爭議，先評擊陳蕾紅館演唱會彈結他甩皮甩骨、唱現場近乎離晒譜咁走音，又於社交平台出PO就《中年好聲音2》評審作出質疑，指唔明撐一個人人都認為唱歌唱得唔好嘅女歌手擔任唱歌比賽評判係咩邏輯，雖然無指名道姓，但疑似影射楊千嬅。前晚（28日），周啟生出席黃夏蕙舉辦嘅晚宴，就兩項言論解話。

周啟生直言陳蕾係佢鍾意嘅歌手，有機會都想合作，只係覺得陳蕾嗰次演唱會可以唱好啲，認為對細路女講真話係錫住佢。至於，疑似批評楊千嬅擔任《中年好聲音2》總決賽評判一事，周啟生接受媒體訪問時直言做評判唱歌唔叻點做評判，續指要認真地做事，如果講明個節目係玩就唔好咁認真，但如果要扮專業就要專業。周啟生又認為《中年好聲音2》都係搞笑，30幾歲60幾歲都係中年，表示唔會睇呢類節目，指自己TVB出身，顧嘉煇係佢師傅，曾兩次奪紐約電視音樂大獎，亦曾為張天愛、鄭少秋做出多首歌曲，強調70年代廣告歌都係由自己、顧嘉煇、陳百強、張偉文及陳欣健獻唱，絕對有資格評論，唔怕得罪人，又強調自己係對事唔對人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！