93歲黃夏蕙最後一場派對完結 自覺身體狀況下滑交代身後事 細女急返港照顧打點

現年93歲黃夏蕙（夏蕙姨）不時舉辦宴會等活動，繼去年與老公潘炳烈舉行結婚35周年晚宴，一圓當年結婚無著婚紗和儀式嘅遺憾，今年5月於沙田慈善基金活動，筵開80席為保良局籌款，活動細節和嘉賓都係自己一手一腳籌辦及親自打電話邀請，出心又出力。黃夏蕙昨日（28日）又於尖沙嘴酒樓筵開60席派對，魏秋樺、周啟生等好友均有出席；不過，黃夏蕙身體大不如前，出入都要由工作夥伴陳建興（Philip）扶住避免跌倒。細女Maggie亦由美國返港出席呢次活動，與Philip齊齊擔任晚宴司儀，原因係與媽媽黃夏蕙傾電話時明顯感到對方聲線虛弱，擔心佢唔舒服，於是即刻買機票飛返嚟，又指好佩服媽媽呢個年紀仲有魄力為晚宴四處奔走。

其實，呢場宴會係黃夏蕙舉辦嘅最後一場派對，佢早於月頭拍攝影片表示自覺身體狀況明顯下滑，所以好希望可以見一班仔女：「最近我覺得身體狀況明顯下滑，好想同外國嘅仔女，一齊影張合照，好心同大家分享，隱藏係心入邊嘅一啲說話。」黃夏蕙更於片中表示原本唔驚死，但擔心做唔晒想做嘅事，又有好多仲未做完嘅責任，所以而家好驚死，不過佢亦承諾於派對結束後去做身體檢查，直言：「而家我做完鍾意嘅嘢，又見埋我啲仔女，我就好開心喇，就算check到我有事都唔驚。」黃夏蕙又交代身後事，指自己已90幾歲，慈善基金「夏蕙之家」要交俾有緣人去做，而百年歸老之後唔會選擇火葬，會將遺體送晒俾醫院，俾人做有用嘅嘢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！