周末話題︰Eason要抖抖 邊個可以幫吓手？

歌神陳奕迅 ( Eason ) 喺上月25 號出席台灣一個電台訪問時宣布，完成與唱片公司合約兩年後暫別樂壇 ,消息一出火速被兩岸三地媒體廣泛報導 ,經理人陳家瑛急忙澄清Eason嘅意思可能係兩年後想 SLOW DOWN 吓,出外吸收一下唔同地方嘅藝術元素啫。

相隔數天 Eason結束倫敦之旅返港後 ,回應退出一事,只係話「放慢啲啫，點會唔唱，只係想啲嘢精啲啫」，同經理人口供一致。如果歌神小休，邊位男歌手可以幫手頂一頂住個「神位」？

根據資料，Eason舊年嘅頒獎禮獲得奬項18個，接咗起碼 5 個大型廣告及代言工作，開咗70場演唱會。以下呢班後生仔，分工合作啦！

張敬軒 - 幫手做年度金曲

軒仔簽咗新公司，十月仲會開紅館

SHOW。今年終於出新歌《青春常駐》，睇播放率有機會成為今年嘅十大。軒仔07年嘅《酷愛》係當年大熱，只要佢寫歌多啲嚟密啲手，一個頒獎禮上台幾次嘅畫面，絕對有機會！

方大同 - 睇實大中華市場

Eason差唔多一出國語碟就有台灣金曲獎提名，近年可以有咁嘅成績嘅，只有方大同。Khalil嘅音樂雖然冇阿臣咁大眾化，但佢係少數能夠打通兩岸三地嘅香港歌手，絕不失禮。

許廷鏗 - 幫手入屋

因為4大公司糾紛，Eason都好耐冇喺大台出現，但係憑住好爸爸形象，接落唔少果汁、眼藥水、個人護理用品代言工作。Alfred舊年成績唔錯，加上係牙醫，仲有TVB嘅滲透威力，入屋呢PART，你嚟！

周柏豪 - 幫手潮、幫手吹

年尾頒獎禮，Eason嘅衣著同台上嘅感言，堪稱近年冇咩睇頭嘅頒獎禮之中，寥寥可數嘅亮點。嗰啲闊袍大袖、風褸車成嘅Baggy Pants仲有邊個著得佢咁好睇？柏豪嘅style當然唔係Eason嗰type，但係你見早排啲潮童都會剪個柏豪頭兼全身黑色，就知柏豪喺潮界嘅影響力。至於吹水，邊有人吹得過阿臣，唔怕！大文豪三不五時晌微博FB Instagram出文，全天候同你訴心聲。

謝霆鋒– 幫手開演唱會

一年開70場演唱會，邊個先有咁嘅號召力？梗係Eason老死霆鋒啦，佢呢期鍾意煮飯，咪好似Jamie Oliver咁搞烹飪Show囉，阿臣技癢嗰陣仲可以上去唱兩咀添。