【2021父親節】呢班藝人以新手爸爸身份迎接首個父親節

今個星期日（20日）就到一年一度嘅父親節啦！大家諗咗咩活動同買咩禮物氹「一家之主」開心呢？喺過去呢一年唔少男藝人榮升做新手爸爸，佢哋將會第一次過屬於自己嘅父親節，而家就同大家睇下有邊幾位啦！

原島大地
電影《忘不了》中飾演張柏芝囝囝嘅中日混血兒童星原島大地，唔經唔覺已經23歲，喺上年宣布與同齡日本圈外女友結婚。去到今年5月初，原島大地喺社交網站上載一段可愛BB嘅影片，透露已經榮升做爸爸。

林溥來 Patrick Sir
《東張西望》主持林溥來（Patrick Sir）與關宛珊（Kimmy）結婚5年，二人一直非常恩愛。喺上年Boxing Day，Patrick Sir宣布太太懷孕消息，今年4月佢哋嘅愛情結晶品林若嘉（Preemo）出世，一家三口幸福美滿。

Sora ＠ ONE PROMISE
樂隊ONE PROMISE的低音結他手Sora喺今年4月宣布圈外太太誕下B仔，榮升新手爸爸。

岑珈其
上年11月，岑珈其與拍拖5年嘅圈外女友拉埋天窗。去到今年1月尾，岑珈其再宣布好消息，於IG限時動態宣布BB出世，正式升呢做人父。

吳雲甫
前香港先生吳雲甫（Owen）喺上年3月與瑜伽導師女友結婚，同年10月太太為佢誕下囡囡Sinead。

向佐
向佐與台灣女星郭碧婷於前年9月拉埋天窗，上年中秋節郭碧婷喺台北誕下囡囡「小奶皇」向芷。

林峯
林峯跟內地模特兒張馨月自19年結婚後愈愛愈高調，上年9月張馨月誕下囡囡「格格寶」，一家三口非常幸福。

羅力威
羅力威與雨僑拍拖7年，於18年結束愛情長跑宣布結婚，二人喺去年情人節宣布造人成功並於8月成功誕下囡囡羅約彌（Harper）。

呂方
57歲呂方與年輕16歲嘅圈外女友伍惠寶（Rainbow）拍拖7年，一向感情穩定，上年5月突然被爆出拉埋天窗，去到8月愛情結晶品呂晨（Emma）出世。

陳山聰
喺19年陳山聰與拍拖5年圈外女友Apple結婚，去年7月Apple為佢誕下囝囝陳霆軒（Jaco）。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！