直播靈接觸｜江美儀頸上胎記原來有意思？仲幫過「朋友仔」完成心願

由「鬼王」梁思浩、黃紫恩（Jojo）及黃耀英主持嘅TVB Plus（82台）互動靈異資訊綜藝直播節目《直播靈接觸》自播出以來反應熱烈，唔少觀眾積極與主持人互動及喺社交平台留言。前晚（25日）播出一集，節目組邀請到視后江美儀及《通靈之王》第一季冠軍「裸泳」羅泳嫻擔任嘉賓。

喺節目中，梁思浩表示第一次見江美儀嘅時候，佢以為美儀被鬼上身，因為當時佢就同陳煒喺友台清水灣製片廠拍攝另一套劇集，喺夜晚點幾鐘佢前往化妝間，喺最尾位置見到有個人喊，佢就話「唔係咁猛嘛？」，於是佢再行近啲睇，嗰個人仲抽搐喊緊同埋有呼吸聲，之後佢就擰個頭埋嚟，而個妝化得好白，再加上啲燈打落去，搞到佢即刻嘩咗一聲！佢就關心問下佢有冇事，原來嗰時情緒麻麻，自此佢同美儀就成為朋友。聽完呢段往事之後，美儀就笑言自己唔記得呢件事。

另外，「裸泳」羅泳嫻喺節目中透過自己設計嘅塔羅牌測出美儀嘅前世今生，表示佢前世做過有錢人、幫過窮人嘅人，亦有做過容易同人爭執嘅人，而佢嘅上一世就有可能係喺第二次世界大戰嘅人。江美儀喺聽完之後即刻點頭表示認同，因為有其他師傅同佢講過類似嘅說話，之後佢再露出頸上嘅胎記，並話有師傅聲稱胎記位置就係佢前世受致命傷嘅地方。

之後，羅泳嫻話佢喺二戰時捱餓都會犧牲自己去幫人，呢個係好加分嘅一件事，所以令佢今世生得靚同名成利就。羅泳嫻仲話佢今世嘅任務係淡薄名利，隨住年齡增長，佢會越追求平和嘅感覺，而偏偏工作就會更多，所以唔需要擔心冇嘢做。

江美儀表示自己係屬於靈異體質，所以不時會有「朋友仔」搵佢幫手，不過都係都係報夢多，好似佢姑媽喺佢幾歲時走咗，走咗冇耐後就發夢見到姑媽，仲講嗰邊生活係點，佢仲講過世嘅爺爺同叔叔都有報過夢俾佢。之後，美儀再講多一個靈異經歷，就係佢以前學畫畫嘅時候認識咗一位C太太，而呢位C太太係因為老公過身而學畫畫，二人更成為好朋友，有一次美儀去佢屋企食飯，先知道C太太老公過咗身。去到C太太嘅細仔結婚，美儀夢見C先生，原來C先生想拜託她做一件事，就係佢有份禮物想送俾個仔，不過唔係結婚嗰個仔，而係大仔，之後仲見到禮物嘅位置。第二日，佢就即刻致電C太太，而C太太真係喺床頭櫃搵到一個雕有龍和雞嘅玉牌，並將玉牌送俾大仔。美儀之後都有買花去拜C先生，並告知佢幫咗佢完成心願，去到夜晚瞓覺就夢到C先生同佢講唔該。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！