《智能愛人》劇情輕鬆搞笑 李佳芯演機械人有驚喜 網民望再衝擊視后

由視后李佳芯（Ali）、馮盈盈及陸永主演嘅新劇《智能愛人》喺前晚（3日）首播，劇情講述高端智能人阿寶（李佳芯飾）喺運送期間意外走失，被人工智能公司職員古家廉（陸永飾）據為己有，將佢帶返屋企做古家嘅女傭AI，期間阿寶啟動自我學習功能，嚐盡人間百味嘅七情六慾，更愛上家廉，但阿寶發現自己身中電腦病毒，生命正在倒數。而同一時間家廉上司多姐（馮盈盈飾）亦愛上家廉，所以對阿寶窮追不捨，誓要將佢銷毀。想知網民們睇完兩集有咩感受，快啲轆落去睇下啦！

劇情輕鬆對白搞笑
劇集喺頭兩集已經交代女傭AI阿寶去到古家，為佢哋處理家中雜務，不過期間都發生唔少蝦碌搞笑事件，例如古家儀（麥美恩飾）扮AI啤酒女郎差啲被大叔非禮及阿寶以「嘟嘟」代替粗口鬧爆豬肉佬，唔少網民睇完都大讚劇集，例如「劇情有趣」、「幾好笑，輕輕鬆鬆1個鐘」、「呢套幾好睇幾好笑」、「好耐無睇港產劇會笑左出嚟」、「好好睇，又好笑，故事幾好，陸永做得好貼切sales角色，標基speaking直情笑左出來，一定追此劇。」及「情節對白抵死搞笑」等等。

好睇過《刑偵日記》
《智能愛人》以人工智能為題材，唔少網民都話題材新鮮又特別，好睇過以人格解離症為題材嘅燒腦劇《刑偵日記》，早前《刑偵日記》嘅收視跌至10.2點再創新低，唔知《智能愛人》可唔可以收復收視失地呢？

李佳芯演智能機械人超強喜感
今次Ali喺劇中飾演AI機械人充滿挑戰性，除咗模仿機械人嘅說話語氣及肢體動作之外，佢仲唔可以眨眼，唔少網民都認為Ali掌握得好好，仲喜感十足，例如佢與古家人劈酒猜枚、被家廉前女友連環爆樽、練習笑容及以「嘟嘟」代替粗口鬧爆豬肉佬等等，紛紛留言大讚及認為佢值得再奪視后，例如「Ali 做得好好，尤其把聲真係好似D電話錄音」、「果然係演得好好!神似又得人鍾意」、「今晚第2集阿寶街市鬧豬肉佬好搞笑,Ali呢套演機械人幾出色,暫時今年最突出,應該可以再拎視后」、「ali做得好似智能人」、「Ali真心勁，機械人無咩表情唔可以眨眼，但佢都有戲係度，好有驚喜。希望快啲多啲睇到佢嘅劇。」、「真係好好睇啊、輕鬆又好笑 連爸媽都話好睇 Ali演繹真係不得了，睇第二次特別留意啲細節位，真係做得好好啊 視后 視后！」及「很搞笑，Ali演得很好，gayau..」等等。

麥美恩演出有有驚喜
喺劇中飾演陸永家姐古家儀嘅麥美恩，繼續發揮其搞笑本色，無論係扮AI啤酒女郎定係對白都都好有喜劇效果，所以唔少網民都留言話佢演出有驚喜，例如「麥美恩既表情又忍不住笑起來」、「麥美恩都好識帶搞笑氣氛」、「Mayanne 演得幾好」及「美恩拍劇有驚喜，演得好好呀！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！