《東張西望》主持訪問《美麗戰場》強姦戲 蔣家旻尷尬：被人強姦其實都唔係好好受嘅

由葉念琛身兼監製、導演及編劇嘅TVB台慶劇《美麗戰場》正在熱播中，而早前播出嘅大奸角「反骨琪」鍾家琪（蔣家旻飾）向威爺（李成昌飾）獻計迷姦家姐鍾家寶（陳瀅飾），不過佢喺通知威爺後飲咗少少酒就倒下，結果害人終害己被威爺污辱，之後仲被威爺以二人性愛影片要求佢任其魚肉同埋去接客，令琪琪大受刺激，一怒之下拎起生果刀刺向威爺。呢一場戲出街後被網民洗版式留言，討論程度爆晒燈。去到前晚（24日），《東張西望》更邀請蔣家旻及李成昌做訪問，不過主持容羨媛（Fion）就以超興奮嘅態度去講：「全城熱睇蔣家旻兩分鐘強姦戲！」，搞到坐喺側邊嘅蔣家旻大為尷尬，並話：「被人強姦其實都唔係好好受嘅。」

主持容羨媛問蔣家旻知唔知道網上點擊率高，而蔣家旻就表示係導演葉念琛話俾佢知，並話：「我諗應該係大家好想睇到鍾家琪個下場係點樣啫。」而李成昌都估唔到一場簡單嘅戲會搞到滿城風雨，連親戚朋友都打電話畀佢：「你就好啦！你就好啦！」，唔係嗰啲意思，而係「搞掂個衰女包！」

之後，容羨媛搞笑問：「你又強姦咗人，然後大家仲好開心咁支持你，你冇被人鬧，你咪最著數？」，李成昌即刻否認，並話：「我好多思考㗎！我哋男演員真係好多思考，有啲位又唔可以過份，但係又要自然，好大壓力㗎！」

容羨媛再指平時嘅劇集都係一秒強姦戲，今次《美麗戰場》係挑戰電視尺度嘅兩分鐘。蔣家旻就表示自己冇刻意計算係唔係兩分鐘，及指拍攝前一晚好大壓力，並補充話：「導演都話嗰場戲唔需要剪出嚟太長，因為係要令觀眾覺得鍾家琪係抵死，而唔係要可憐佢。」

容羨媛追問當晚有冇同屋企人一齊睇，蔣家旻就話：「嗰一晚我係同一班演員睇，大家都睇到好肉緊，我自己都揸住拳頭，原來出嚟效果係咁」、「效果幾好，辛苦都值得嘅，唔好再有第二次！」而李成昌就搞笑話：「冇啦！冇啦！威爺已經死咗啦！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！