《釀魂》監製發文鬧爆某演員零宣傳電影後刪除：您將來有幾紅我都唔會尊重

奇幻驚慄電影《釀魂》由 Anson Lo@MIRROR（盧瀚霆）、陳紫萱、朱栢康、吳肇軒、郭翠怡等人主演，電影上映接近一個月，票房累計收逾600萬，雖然成績唔算好標青，不過已經成為今年暑假檔最快破100萬嘅港片。早前監製黃永峯喺IG發長文，表示電影即將落畫及感謝幕前幕後團隊嘅付出，不過佢喺致謝戲中演員時，似乎對一位演員不作宣傳感到失望，而監製喺文中標註演員名單中獨欠袁澧林（Angela），所以唔少人都猜測監製矛頭直指袁澧林。其實監製喺前一個PO已經單打呢位演員，不過個PO已經刪除咗。

監製黃永峯喺呢個已被刪除嘅PO首先答謝大家嘅支持，之後又指聽到好多對電影嘅各種讚美，同時佢仲非常欣賞導演嘅野心。不過佢最後加上一句︰「其實我幾討厭有份參與電影但連一點宣傳力都唔俾嘅人… 您將來有幾紅我都唔會尊重… bye」 ，之後標註幕後及演員名單，但獨欠袁澧林。

袁澧林喺劇中飾演張子傑（Anson Lo 飾）已過身嘅女朋友程嘉露，戲份唔多，早前佢亦缺席《釀魂》首映。不過根據《釀魂》出品方資訊顯示，袁澧林被介紹為特別演出，與姜大衞及林耀聲同列，並非主演演員，而佢又真係冇喺個人社交網站上載有關《釀魂》嘅相片及資料。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！