《飯戲攻心》宣布開拍續集舊班底冇影？ 網民：冇咗子華神已經大打折扣

上年上映嘅 港產喜劇《飯戲攻心》由黃子華、鄧麗欣（Stephy）、林明禎、張繼聰、王菀之、陳湛文等人主演，票房大收逾7700萬，成績相當彪炳，唔少影迷都期待電影開拍續集。喺今日（6日）電影公司喺社交網站宣布落實開拍《飯戲攻心2》，不過宣傳帖文未有寫上舊班底嘅名字，只見胡楓、黎彼得、謝君豪及羅蘭等演員名稱。

喺今日，電影公司以喜帖形式嘅照片宣布開拍續集，圖片上寫上：「 謹定於公曆二零二四年為導演陳詠燊 陳氏一家 飯氣攻心2新婚之喜，假座全港戲院盛大舉行，敬備爆谷汽水恭候全港觀眾光臨。」之後再公佈演員名單：「男家：「大伯父」胡楓、「三叔」黎彼得、「六叔」謝君豪、「七叔」蔣志光、「表弟」何啟華、「堂細佬」胡子彤；女家：「婆婆」羅蘭、「豬媽」米雪；表演嘉賓魏浚笙，及觀禮嘉賓廖子妤、余香凝、楊偲泳、凌文龍及林家熙」。

喺照片中一個舊班底嘅名字都未有出現，但「二哥」張繼聰及「阿Meow」林明禎都有留emoji表示支持，同時唔少網民留言關注舊班底嘅去向。例如「原班人馬不在名單？」、「但係大佬呢？」、「冇咗子華神已經大打折扣」、「不如改埋個戲名算啦，都唔係原本套戲喇喎！」、「有埋 Stephy 同明禎好似整齊啲，有返個隊形」、「子華神呢?!?!」及「黃子華呢？」等等，不過唔少網民都表示期待「喜慶日子咁齊人，連隔籬《大狀》團隊都嚟埋，仲唔咩嗱嗱臨開飯？」、「雖然冇子華神 但係陣容已經好鼎盛」、「好開心，有謝君豪」、「謝君豪X蔣志光，有睇頭喎」、「本身睇cast擔心會唔會好tvb…見到凌文龍就有返啲信心」、「好期待」、「支持何啟華2億!!!!」及「同款表弟想要一打」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！