《CHILL CLUB 推介榜年度推介20/21》周日舉行 賽前預測邊位歌手會得獎

香港樂壇第五張成績表 《CHILL CLUB 推介榜年度推介20/21》將於今個星期日（18日）晚上8點舉行，當晚大會將會頒發11個獎項，而「年度男／女歌手」、「年度組合」、「年度唱作歌手」、「年度新人」、「年度十大歌曲」就由全港樂迷一人一票選出。而家就同大家一齊預測一下賽果喇！

「Chill Club年度男歌手」：姜濤
原因：新一代「人氣王」姜濤，今年年頭嘅《叱咤樂壇頒獎典禮2020》姜濤捧走「我最喜愛的男歌手」及「我最喜愛的歌曲大獎」。姜濤自參加《全民造星》開始，人氣一直高企，深得一眾姐姐歡心。有龐大姜糖團員力撐，再加上有主場之利，姜B真係絕對有機會得獎。

「Chill Club年度女歌手」：AGA江海迦
原因：歌手AGA江海迦係頒獎禮常客，近年嘅派台歌都深受樂迷喜愛。佢喺上年年尾及今年年頭舉行嘅《新城勁爆頒獎禮2020年》、《2020年度叱咤樂壇流行榜頒獎典禮》及《第43屆十大中文金曲》已經獲得女歌手獎項，憑實力及受歡迎程度，AGA江海迦要問鼎年度女歌手，相信唔會有太大嘅難度。

「Chill Club年度組合」：MIRROR
原因：偶像組合MIRROR12位成員各有特色，自出道以嚟MIRROR人氣有增無減，喺香港掀起久違嘅追星熱潮，5月舉行嘅演唱會兩度加場都火速售罄。受歡迎程度真係不容忽視，加埋主場之利，睇嚟其他組合都好難同佢哋爭㗎啦！

「Chill Club年度唱作歌手」：林家謙
原因：林家謙（Terence）絕對係近期冒起嘅全能歌手，上年更推出多首大熱歌曲，包括《一人之境》及《時光倒流一句話》及《特倫斯夢遊仙境》，除咗自己嘅主唱作品之外，佢亦有為唔少歌手作曲，好似今年就有張敬軒嘅《重頭開始》及Jace陳凱詠嘅《虛擬人與我》等等。林家謙深得唔少樂迷愛戴，唔少網民都話睇好佢同埋已經投咗票畀佢。

「Chill Club年度唱作新人」：Jer柳應廷
原因：MIRROR成員Jer（柳應廷）上年以個人身份推出「物語系列」三部曲，包括《風靈物語》、《迴光物語》及《水刑物語》均大受歡迎，仲喺頒獎典禮以大熱姿態獲得多個新人獎項，所以唔少網民都認為呢個獎係佢嘅囊中物。

「Chill Club年度十大歌曲」：根據網民留言及MV點擊率作出預計
莫文蔚《呼吸有害》
林家謙《一人之境》
許廷鏗《無力感》
陳凱詠《天生二品》
RubberBand《First Date》
MIRROR《IGNITED》
江海迦《See You Next Time》
柳應廷《迴光物語》
姜濤《愛情簽證申請》
Serrini《~旋轉with me*》

唔知大家又最想邊位歌手攞獎呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！