「乒壇嫲嫲」倪夏蓮都玩小紅書 同老公瘋狂放閃 個仔撞樣霍啟剛

喺巴黎奧運出戰乒乓球女單比賽嘅盧森堡選手倪夏蓮，以61歲高齡第6次出戰奧運挑戰世界各地高手，仲喺第一圈賽事擊敗土耳其球手晉級。雖然喺次圈倪夏蓮輸俾中國隊「世一」孫穎莎，但係已經贏得世人掌聲，唔少年青網民呢期睇完奧運封倪夏蓮為「乒壇嫲嫲」。

倪夏蓮賽後話「年齡只係數字」成為金句，鼓勵大家超越年齡追尋夢想。而倪夏蓮亦都身體力行，除咗打乒乓波之外仲喺社交平台小紅書分享生活。

倪夏蓮比賽期間，老公兼教練Tommy Danielsson喺場邊指導之外仲不時親吻太太，而倪夏蓮喺小紅書都不停放閃，唔少片段都見到Tommy出現，當然唔少得錫錫啦！介紹盧森堡嘅夏天，錫！去巴黎備戰，錫！生日就梗係有birthday kiss啦。倪夏蓮呢一年不時出國比賽爭取奧運入場券，年初佢去英國參賽仲帶年青隊友去食中國菜，好歡樂。

原籍上海嘅倪夏蓮去年底返家鄉探親祭祖，倪夏蓮拍片分享旅程，囝囝亦同時曝光。原來倪夏蓮囝囝係喺上海開設物理治療診所，倪夏蓮就帶囝囝去其他診所見識。唔少網民睇見倪夏蓮囝囝都話激似霍啟剛！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！