【下月結婚】母被指欠債100萬人仔 貝安琪:想專注自己家庭
安琪同歐陽妙芝(Christine)同今日喺銅鑼灣出席護髮店開幕。去年2月未婚生子嘅貝安琪,下月將會與比佢細4個月嘅加拿大籍男友Simon Van舉行婚禮,貝安琪話依家開始感到壓力,佢話:「有太多朋友俾意見,我都知個個都係好nice,不過太多嘞,我都同啲朋友講唔使太關心,自己都計劃好,Simon都有俾意見。」而囝囝小龍會做花仔,但貝安琪笑言就買漏咗佢套禮服。提到Rosemary嘅囝囝,Ankie大讚好得意,連小龍都鍾意成日叫Baby,而貝安琪都想追個女,但呢兩年先以工作行先。
至於提到媽咪劉香萍會唔會因被追100萬人民幣影響心情?貝安琪話:「我冇乜同佢傾工作上嘅嘢,我都已經係簽咗第二間management,想專注番自己嘅家庭上。」
另外,Christine自爆多年來一直有頭皮痕癢問題,導致未有充足睡眠影響身體機能,佢話:「呢幾年真係好困擾,不過依家已經好咗好多,有覺好瞓。」Christine話最近忙於幫大仔搵學校,計劃明年到澳洲升學,佢話:「係佢自己講話想過外國讀書,諗住會去澳洲,因為老爺喺嗰邊,佢好多同學仔都飛咗啦,下年飛都14歲,都會唔捨得嘅,不過男仔,等佢訓練吓獨立,將來都會成家立室,最想佢哋思想獨立,等佢自己闖一闖。」原來Christine已經諗定兩個仔去咗外國讀書,佢就開始做番自己,佢話:「因為依家冇乜時間完成自己嘅心願,有好多嘢仲想試,有好多地方都想去,亦都有好多啲嘢想學,學到老嘛,自己想學語言、畫畫同唱歌。」