【兵行險着】無懼負評望以汪阿姐做榜樣 王祖藍拍歌舞片回饋香港

王祖藍第一次擔任導演，冒險拍攝以歌舞為題材的愛情喜劇電影《你咪理，我愛你﹗》，祖藍日前於觀塘接受訪問，直認自己兵行險着，祖藍說：「中文電影歷史上，歌舞片係唔容易接受，好似華人觀眾唔係好慣，因為歌舞片係自己喺演藝學院時已經好鍾意，獎門人（曾志偉）同我講，話呢部戲贏可以好爆，但輸可以好死，呢部戲冇中間，但係佢好撐我。」《你》片由超過50位演員演出，當中包括曾志偉、毛舜筠、鄭秀文、容祖兒、余安安、方力申等，陣容鼎盛，祖藍說：「與其拍一部大家平時都見到嘅賀歲片，不如即管試吓拍啲唔同嘢，歌舞片大家聽到鍾意會想郁，歌舞喜劇，算易入口，講兩性關係又搞笑。齣戲好多香港景點，有好靚嘅景，想畀大家睇到唔同顏色嘅香港。」

戲中所有歌詞由祖藍填寫，祖藍表示，14年前與風車草劇團合作舞台版，是次重新編寫，有10多首歌，整齣電影有50分鐘對白，50分鐘歌舞。祖藍說：「10多年前用幾個月時間寫歌，兩年前同紐約傾版權，傾版權唔順利，美國人問得好仔細，問你點解用廣東話，點樣拍，之後好多謝金培達，佢將兩個作者介紹我識。中間其實放棄咗，獎門人問我拍唔拍賀歲片，咁啱嗰日就收到電郵話可以傾版權。獎門人睇咗頭幾場我拍嘅片之後，佢話得嘞，諗唔到我咁拍，全力支持我，咁我就放心。」

第一次做導演，祖藍表示戰戰兢兢，他回想：「方逸華年代已經問我做唔做導演，但自己未準備好，而家有自己公司，製作上有經驗，樣樣識少少，係時候去做導演，但係驚歌舞片好冒險，好驚碌晒人情卡，請晒朋友嚟但拍得佢哋唔開心，朋友都冇得做。」祖藍透露，是次最大困難是掌握時間，他指一部港產片成本不高，而且他今次用港產片文戲的成本去拍一齣歌舞片，祖藍說：「第1日攝影師同我講，話呢齣戲要拍40日，一般香港片10幾日就拍完，想喺有限嘅成本空間內嘗試，如果今次得先至有下次。最終冇超支，但收唔收得番就要睇（情況）。」

祖藍近年多在大陸發展，香港觀眾對其批評甚至不滿，祖藍回應：「係有少少唔開心，但係唔開心都係好事，你愛呢個地方，拒絕你先至會唔開心，如果對呢個地方完全冇感情嘅就唔會care，好似你鍾意嘅女仔拒絕你先至會唔開心，都算係一件好事。」香港觀眾對自己不了解，祖藍說：「每個人都有自己角度，唔係太大所謂，乜都聽吓，改到就改。」祖藍到大陸掘金後，香港觀眾逐漸反感，祖藍說：「可能啦﹗每個人有自己諗法，我要尊重。我每年好多時間喺香港，可能內地製作焦點大。」對於賺人民幣是不是原罪，祖藍說：「可能有人咁睇，但我唔會咁諗，相信有好多有自己諗法嘅觀眾。」香港怨氣重，祖藍表示，最重要是帶歡樂給香港，他表示會以汪明荃做學習榜樣，他說：「汪阿姐好值得學習，極力爭取興建戲曲中心，同政府做嘢，同國家做嘢，仍然敢言為自己行業爭取，唔會特別避開政治，汪阿姐呢種風格好值得我哋學習。」

剛榮升做爸爸的王祖藍明言，會趁老婆李亞男後生再追多個，祖藍說：「趁亞男35歲左右追多個，太遲女人會辛苦，起碼兩個，小朋友社交會好啲，有多個兄弟姊妹。」祖藍笑言做爸爸後心態改變，需要重新學習很多，他說：「發覺自己好低能、無能，換片、洗碗、餵奶係好簡單，但點解我會雞手鴨腳。男人嘅責任係照顧屋企，仍然要注意老婆情緒，女人好辛苦，生咗幾日之後都好痛，又要餵人奶，夜晚又要起身，日日睇住個女，要更加錫老婆、囡囡、更加錫媽咪。」對於囡囡樣貌，祖藍說：「女大十八變，最緊要唔好似我，眼仔似媽咪，女仔大個唔知，最緊要生性，樣冇所謂。」

採訪：張俊銘
場地：御一共享空間

髮型：Ted Yeung @ i i Alchemy hair & nail
化妝： K.T. Tsui
造型：Dicky Lee