【再度重遇你】由緋聞情侶變仇人 關心妍同蕭正楠終極破冰
關心妍(Jade)同蕭正楠(Edwin)同樣係2002年新人,兩人其後唔單止有合唱歌《特別鳴謝》,仲傳過緋聞。未料最後由緋聞情侶變成鬧不和,之後出席活動被傳媒要求合照都表現尷尬。
不過,時間可以沖淡一切,Jade同Edwin其實早年都已經喺公開場合碰過面,而且都有打招呼互相問好,日前Edwin仲請咗Jade上佢主持嘅節目「美女廚房」做嘉賓,今次真係正正式式破冰喇!
Jade今日都喺社交網貼咗兩人合照,仲有兩張就分別同鄭希怡(Yumiko)及草蜢影嘅。佢寫道:「我和蕭正楠Yumiko都是同期出道的新人,以前因為剛出道的緣故,所以經常見面。一晃眼16年了,好耐沒有同場工作,今次好開心可以在#美女廚房聚一聚!當然不少得有草蜢一起做節目,更加精采!」
《蘋果》今日問Jade,想唔想同Edwin整番首2018合唱歌?佢就笑住話:「估唔到大家仲記得呢首合唱歌,好彩我同蕭正楠仲記得歌詞,有機會唱返個 full version 都好喎,隔左咁多年應該會唔同feel!」