【冠軍成焦點】Ian、Lokman被忽視覺心酸 姜濤：呢行好現實

《全民造星》終告落幕，成功發掘熱血新人加入娛樂圈，經過幾個月來競賽，姜濤憑一張少年彭宇晏萌爆面孔加上派心心動作，成功奪取女性歡心，由頭帶到尾跑拋離對手，坐定跑出獨吞100萬元現金獎成為冠軍。

100萬對於現年19歲嘅姜濤嚟講係驚喜數字，雖然暫時未諗到點用，但快速竄紅嘅佢，錢未使已經開始吸金拍廣告參加商業演出，同時亦成為不少娛樂公司搶手貨。亞軍陳卓賢（Ian）同季軍楊樂文（Lokman）前者歌精、後者舞勁，分別想做歌手同演員，希望透過比賽完夢。

昔日團體集訓日子不再，三人有一種莫名失落，但開心嘅係多咗一班粉絲支持，姜濤話：「希望唔好令佢哋失望。」累計多咗女粉絲？佢話：「冇統計過，男女都冇所謂，有啲男仔見到我哋咁努力，又想參加第二季都幾好。」大家都關注姜濤獨得100萬元現金獎會點用，佢話：「一定會請《造星》食飯，仲有花姐（監製），未諗到點用都好正常，人生未試過有咁多錢在手，會問屋企人意見研究吓。」並指會送電話俾Ian同Lokman，不過唔係智能電話，仲叫大家敬請期待。

姜濤好快已經有實質工作，接拍護膚品廣告搵錢及拍劇，廣告同Ian一齊合作，佢話：「好開心，因為做自己鍾意做嘢，又可以搵到錢。」姜濤目標係做一位跳唱歌手，由參賽至今一直成搶手貨，姜濤去向仍未定，只透露好快有定案，佢好謙虛話：「平常心面對，越得到多嘢，越要謙虛，唔好覺得自己好多選擇，俾人覺得你囂張，客觀啲去睇到底邊度啱自己。」

姜濤送心心派糖迷倒女性，拍攝當日佢勉強地展示呢個動作，並一臉稚氣指：「我自己都厭，大家快啲反對呢個動作，其他人就唔會再叫我做，我諗緊第二啲新動作但未諗到。」每次見到姜濤不驚意冧女畫面都令到粉絲驚呼狂叫，雖然明顯地受女性歡迎，但姜濤就否認：「幼稚園時唔係㗎，真正懂事時同異性冇乜緣份，好有距離感，有種自悲感，我性格覺得自己襯唔起人，嘢都唔想同人哋講，o依家多咗女仔想認識我，但工作好忙，冇時間去識女仔，同性朋友投緣啲。」

姜濤走勢凌厲，所有目光都放在他身上，亞軍Ian同季軍Lokman往往都被忽略，難免有種酸溜溜嘅感覺，幸好佢哋兄弟同心戰勝虛榮，Lokman坦承：「少少酸啦，又係你……」，Ian就叫姜濤多多關照，姜濤反安慰佢哋：「正常㗎，換轉係我都會，自己做嘅嘢好似冇意義，呢行好現實，唔係你做到就係好，同運氣都有關，所以我理解佢哋感受，唔會怪佢哋酸，將心比心都會有。」Lokman接收到兄弟安撫亦呼應：「我哋都各有粉絲，接收到好多愛，愛大過酸好多。」

不過Ian同Lokman都有因比賽而受惠，多咗粉絲支持已經好開心，Lokman話：「多咗萬幾人follow我IG，出街都有人搵我影相。」而Ian就預料會多咗咁多人認識自己，Ian喺評判眼中公認唱歌最好聽學員，而佢目標係想成為一位歌手，佢話：「唱歌係我首選，最希望出到自己唱片，包含自己創作歌曲。」Lokman正籌備電影《狂舞派2》開工，在三人之中Lokman言行比較穩重，幕前經驗比其餘兩位多，佢希望繼續向演戲方面進發，跳舞雖然係強項，但會視為興趣令自己開心，Lokman亦已經名草有主，不時在網上放閃，展示同女友合照，佢話有意計劃結婚，不過就要儲多啲錢先。