【初登銀幕】捱咗10年事業見曙光 何遠東：到六十幾歲都會繼續做

一講起電視上肥仔，喺腦海好容易會有人選浮現，近年喺螢幕上擔演唔同角色嘅何遠東，就係其中一個，因為劇集《降魔的》，畀觀眾發掘到佢實力，喺08年由從舞台劇演員走進電視圈，捱咗10年事業終於見曙光，今年仲有機會走上大銀幕，參演八爺袁和平執導嘅電影《葉問外傳：張天志》，雖然只係做一個小混混角色，但係何遠東嚟講，已經係一個發揮機會！

何遠東日前喺鰂魚涌接受訪問，回想當日收到邀請，心情仍然激動：「嗰晚有人打嚟：『你好，何遠東，八爺有套戲想搵你演，唔知你個期得唔得？』，我聽完之後話唔好意思，八爺即係邊個？嗰個人同我講八爺係袁和平，我即刻吓咗幾聲，再問佢講乜嘢話？我問咗好多嘢，再答佢我個期應該得，最後我消化唔到個消息，叫佢聽日再打畀我。」

何遠東仲話：「我只係一個普通舞台劇演員再拍吓劇，你問我袁和平係邊個我梗係知，但八爺我真係唔知，嗰吓好震撼，忐忑咗一晚。」到咗同八爺見面嘅時候，肥東話：「佢好快就問我要拍打戲好唔好？我話好。拍八爺電影有得打係榮幸，我喺演藝有學過基本功，點樣碌落地下，點跌唔受傷，一路袋住喺身，喺八爺指導下，將我嘅不可能完全擺晒出嚟！」

電影中肥東同張晉、釋彥能有打戲：「第一眼望到就諗，如果受三拳幾腳我會唔會死㗎？然後要嘭一聲飛埋窗，八爺唔會咁易放過你，佢會話你打咗嗱？頭先係咪出咗力？可唔可以認真打一次，反正我成世人未打過交，拍完就知打交感覺係會痛會受傷，知道乜嘢係功夫電影。」

肥東希望向電影方面發展，自稱係一個好深戲癮嘅演員，想畀人見到有唔同一面，肥東話：「喺電視範疇做下把位，早排同朋友傾偈，喺我十年演藝生涯，最叻係做小人物，人哋會記得你，我反思好多次，可能我外型樣貌感覺係容易畀人蝦，有嗰種想過嚟恰我、打我嘅感覺，但小人物都有佢發光嘅一面。」講到舊年喺大台頒獎禮有份提名最佳男配角，佢話：「簡直係受寵若驚！參加咗一年好興奮，今年祝福人，o依家多咗唔起眼嘅配角有份提名，係一種鼓勵，我做到六十幾歲都會做，當然啦，有人大膽搵我做主角我都一定做，我都等呢一日出現。」

今年係肥東入行十周年，入行以嚟都有唔少辛酸：「嗰時乜都唔識，我第一套劇連推門入嚟講句對白都錯，你唔會知推門要等轉第幾號機，又唔知道具點擺先拍，好辛苦㗎，完全唔明白，成日都畀人鬧，好彩我性格幾樂觀，EQ又高，我永遠都會講對唔住，我真係唔識，你可唔可以話畀我聽有乜嘢唔好，或做一次畀我睇，身邊多天使教我好多。」佢仲話：「我相信肥仔都有出頭天，我記得入演藝時要作文，我當時已經寫我要做好綠葉、甘草演員，十幾歲就寫呢啲，倒轉頭睇主角真係未必到你，冇配角又唔會有主角。」