【劉浩龍被隱形】同過氣密友何韻詩世紀合照 容祖兒：我哋唔係仇人

當年因為一個劉浩龍（師兄），何韻詩跟密友容祖兒擘面絕交，6年後，日前兩女在東京重逢世紀合照，網民都嘩然！昨晚祖兒到澳門為英皇演唱會演出，在後台被記者圍攻，問到去完日本係咪好開心？祖兒話：「放假梗係開心。」問到同邊個去日本？祖兒表示：「我自己去囉，見到好多人。其實捧明哥場，嚟緊兩個月我係唔會有一日假期，因為出碟啦，北京、台灣啦係咁飛，我都係托明哥嘅福，去日本支持佢畀啲愛佢，亦都喺後台見到好多朋友，影相啦咁樣啦，我亦都完成咗自己嘅願望。」

問到完成乜嘢願望？祖兒話：「支持明哥！」記者取笑：「以為重修舊好！」祖兒順得人話：「如果我可以娛樂到你哋，我好開心。」追問係咪同阿詩重修舊好？有備而來嘅祖兒表示：「其實從來冇唔好囉！我諗關係上冇太大問題，係對我嚟講啦，喺成件事裏面我自己覺得冇嘢，同埋緣份囉，所以對我嚟講喺咁嘅場合見到係好自然嘅事，影到張相，大家開心，我覺得觀眾亦都好唔冷靜，然之後我覺得成件事娛樂度好高，咁就得囉。」

對於外界好大反應好激動，祖兒話：「呢張相實在太多關係喺度，觀眾有觀眾嘅聯想，但其實最開心係呢三位女歌手，我、千嬅、阿詩，大概十年前，我哋曾經一齊喺頒獎禮裏面等攞獎。」祖兒話呢張相係英皇工作人員拍攝，對於有傳師兄都喺日本？祖兒扮儍反問：「係咪呀？好似係喎，其實大家睇到啲新聞有自己聯想，我講大家未必信，我唔講大家猜想，我覺得唔需要解釋咁多，網上平台大家可以有自己思維，你哋見到啲乜咪乜囉，見唔到咪唔好諗嗰啲，唔好儍囉！可能嚟咗我唔知呀，冇睇到呀，你哋講到娛樂圈好複雜，總之好純粹大家聚舊，大家想明哥開心。我梗係開心，可以放假，眼袋都細咗。」

同阿詩關係變番好友？祖兒再強調：「從來都係好友，冇唔好友，你想我哋好差咩！」有冇趁機會同阿詩傾偈？祖兒話：「完咗騷大家都有去慶功，當然有傾偈，我哋真係唔係仇人嚟㗎，你信我，信一次啦好嘛！」記者笑佢哋唔係仇人，只係唔friend！祖兒話：「唔會，大家唔好諗多咗，做朋友梗係有唔同階段。」係咪唔開心階段已過去？佢表示：「總之就ok啦，亦都會係好ok嘅，好難得有班朋友有咁多回憶，大家聚舊話當年，過程係開心。」

係咪可以好似以前三個咁friend？祖兒話：「冇嘢冇可能㗎，係咪先，你哋想嘅話，驚你哋受唔住呀，哈哈哈！」問到跟阿詩同師兄都係朋友？佢話：「除咗家人咪朋友囉！」

此外，問到大陸限酬令有冇影響工作？祖兒表示：「呢樣我唔知，嚟緊兩三個月都喺大陸台灣。」大陸限酬每季1,000萬人仔，有冇賺少咗？佢話：「本身唔多嘅。我未聽過呢個數目字，大佬，有冇搞錯。」