【又一個離巢】大台出道轉眼十六年 34歲沈卓盈回復自由身

現年34歲嘅大台小花沈卓盈（沈大師），2002年參加大台第四屆《TVB周刊》Cover Girl選舉奪冠入行，一做便16年，佢去年底約滿，深思熟慮後決定唔再續約向外闖，沈大師今日喺Instagram貼文，宣佈回復自由身。

沈大師貼出一張華麗轉身甫士照片後，佢留言：「時間飛逝，轉眼間已16個年頭，回想當初參加《TVB周刊》所舉辦的Cover Girl選舉而入行，不經不覺喺呢個大家庭保護下慢慢成長，喺度讓我衷心多謝公司一路以來對我的栽培同愛護，沒有公司，也沒有今天的我。」

沈大師逐一多謝高層杜之克、樂易玲、曾勵珍同余詠珊，仲有用過佢嘅監製同每位台前幕後工作人員。沈大師仲話：「最後，怎可以漏多謝一路陪伴我成長嘅傳媒朋友和觀眾們，對我工作評價好壞我都一一接收，感激您們一直以來嘅支持及關心，往後日子我會繼續努力工作，讓自己繼續進步，可以嘗試更多不同類型的演出工作。最後祝TVB所製作的節目，收視節節上升、業務蒸蒸日上，也祝大家新年快樂工作順利。#js520」沈大師用「520」，即「我愛你」諧音作結。

沈大師事業有新發展，其實佢愛情方面都好穩定，佢同家族經營內衣褲出口生意的男友Calvin拍拖以來都非常恩愛，不時影到佢哋出雙入對。剛回復自由身嘅沈大師，據知佢已接到好多新工作，佢今日喺Ig限時動態仲貼出身處大雪中。

沈大師今日回覆《蘋果》，講番娘家無綫時話：「都有唔捨得，畢竟同公司合作咗十幾年，大家一直關係好好，只不過自己0依家想嘗試多啲唔同類型嘅工作，學下獨立，咩都會試下，希望可以多方面嘅發展，繼續努力工作，新一年，新開始。」