【古天樂仲喺度】霆鋒入選「我最喜愛的男歌手」 周柏豪方皓玟暫跌出十強

商台「2018年度叱咤樂壇流行榜頒獎典禮」公開投票，走勢日日唔同，今日大會喺社交平台貼出「我最喜愛的男歌手」十強最新走勢，宣佈強勢回歸樂壇嘅謝霆鋒殺入十強，暫時踢走周柏豪。

繼古天樂被網民召喚，歷史性打入「我最喜愛的男歌手」十強後，今日又有新update啦，就係近年醉心廚藝嘅Chef Le Mon謝霆鋒踢走大文豪周柏豪，打入十強。

謝霆鋒近年專注飲食界，不過佢今年年頭商台嘅頒獎典禮上，擔任開場表演嘉賓，勾起大家對《活著Viva》集體回憶，加上今年又出咗《有火》、《放肆》同《青空》三首歌，一直盛傳佢出年會開演唱會，大有回歸樂壇之勢。霆鋒絕迹香港樂壇頒獎禮17年後，佢個名再次出現喺頒獎禮名單上，對於鋒迷嚟講好有親切感。

投票過咗兩日，十強最新走勢，「叱咤樂壇我最喜愛的男歌手」謝霆鋒in， 周柏豪out。其餘九人，唔依次序分別係古天樂、吳業坤、周國賢、胡鴻鈞、陳柏宇、陳奕迅、許廷鏗、麥浚龍、張敬軒。

至於「我最喜愛的女歌手」走勢方面，重返樂壇、今年仲開埋演唱會嘅黎瑞恩in，方皓玟out；而「我最喜愛的組合」則係逆流in，Super Girls out。