【喊唔出？】《皓鑭傳》開播惹負評 于正拎吳謹言喊戲同張曼玉相提並論

去年熱播嘅大陸劇《延禧攻略》掀起煲劇潮，女主角吳謹言更憑呢套劇於第24屆華鼎獎奪得「中國古代題材電視劇最佳女演員」。食住呢個勢，《皓鑭傳》再用原班人馬拍攝，講戰國時期，秦趙兩國之爭，吳謹言飾演嘅李皓鑭係趙國禦史李赫嘅囡囡，李皓鑭被繼母誣陷與人私奔，有辱家聲，繼母執行家法將李皓鑭丟落池塘，幸好獲救，佢靜靜雞再返家時，卻目睹親母畀人推落井處死，李皓鑭衝向井口激動大叫，表情傷心難過，欲哭無淚，最後被繼母賣走，流落異鄉被商人「呂不韋」聶遠買下，獻給當時的秦國質子「嬴異人」茅子俊，形成三角關係。

呢套劇上周六於愛奇藝開播，而無綫就要下個月4號先播，唔少人都準備再追劇，之不過大陸網民睇咗幾集即批評女主角吳謹言嘅演技，批評「連母親死都哭不出眼淚」、「一如以往地面癱」等，製作人于正噚晚喺微博回應，支持吳謹言，指吳謹言喺劇中見親母畀人掉落井嗰幕冇喊，佢解釋係因為人喺突然遇到突發狀況時，大腦會唔願意接受呢個訊息，除咗大叫同反抗之外，冇辦法做出更多嘅反應，佢寫道：「很多人說，《皓鑭傳》第一集吳謹言在母親被丟入井裏的那一刻沒有哭，只會嚎就是表演不好。我很想笑，請問誰經歷過猝不及防的親人遇害?沒有吧，我來告訴你，人在遇到這樣的事時不會哭的……譬如《甜蜜蜜》裏張曼玉看到曾志偉的屍體時，她先笑了，然後才是哭，因為悲傷是需要時間去傳遞……」

于正指吳謹言相比喺《延》已經有進步，有網民支持吳謹言，指佢仍有再進步嘅空間，認為「吳謹言演技有所進步，只是人們太苛刻罷了」、「延禧攻略勝在劇情，吳在裏面表演其實很生硬，甚至有些造作，這次這個皓鑭傳，演技略有提升」；另有網民唔同意于正拎吳謹言演技同張曼玉對比，紛紛留言「居然拿張曼玉做對比，你是認真的嗎」、「張曼玉在甜蜜蜜裏的表演可不僅僅是先笑後哭這麼簡單」。

此外，有網民罵新劇將歷史改得太誇張，又唔合理，歷史上趙姬（即係李皓鑭）係一代淫后，而劇中嘅李皓鑭就係充滿正能量嘅人，人物與角色反差太大，令網民難以接受，劇情最終講李皓鑭積極改變命運、呂不韋想成為人中之王、政治人質嬴異人想返回秦國，三人決定結盟於戰國歷史追求理想。