【回鄉證相遭酒店職員外洩】周柏豪嬲爆：摷埋我條底褲係咩顏色都得

周柏豪今日到商台宣傳新碟，佢話今次呢隻大碟擺明係公器私用，因為成隻碟都係做嚟送畀太太：「自從轉咗新公司後就開始做呢個project，由製作班底到創作全部都係自己搵。」連封面都係佢同太太嘅合照，不過見唔到太太個樣，佢笑言：「咁樣就足夠，我唔想太多人認到我太太個樣。」啱啱11月尾就係柏豪同太太結婚兩周年紀念，佢話冇特別慶祝，只係同太太去咗泰國旅行。

同時柏豪又透露日前喺大陸江門舉行演唱會時，發生咗唔開心嘅事，事緣柏豪喺入住嘅酒店check in，由於所有住客都要提供回鄉證登記：「登記咗幾個鐘頭後，我綵排時收到經理人通知，我回鄉證嘅相已經喺微信朋友圈度瘋傳。」

柏豪直言知道後好唔開心：「呢個年代好多嘢都唔post得、唔影得，包括個人私隱。你影得我回鄉證，即係有機會趁我唔喺房嘅時候上嚟摷我啲嘢，睇埋我條底褲係咩顏色都得。」

於是柏豪話當晚返到酒店投訴，獲酒店高層同埋涉事職員道歉，佢話：「我返到去啲酒店職員同員工自己衝上嚟我間房道歉，好彩我當時有着衫，佢哋叫我畀次機會，又鞠躬道歉，我都惟有接受，否則仲可以做啲咩？」

柏豪強調唔係要炒咗個職員，只係希望明白呢啲個人私隱唔應該傳出去：「最重要呢間酒店唔係得我一個人住，遲啲張學友開演唱會都有機會住呢間酒店，我都唔想學友哥哥有機會張回鄉證畀人見到。」