雅虎香港新聞 【娛事者】鄭保瑞：由場記到導演 由胡志明市到九龍城寨
鄭保瑞執導的《九龍城寨之圍城》票房勁收，在法國康城影展的「午夜展映單元」上映後，觀眾站立拍掌近10分鐘，這個時刻，得來不易。
鄭保瑞，圈內人稱瑞導，喜愛他的，是知道他開戲不止有工開，每日隨時會有超時補水；怕他的，是知道有開工，冇收工，一隊crew跟着他拍到天昏地暗，尤其是拍廠景，密封的情況下不知時日過，拍過一天廿四小時是等閒事。
回看鄭保瑞兩、三年前的訪問，可以看到鄭保瑞如何由場記到導演，由胡志明市走到九龍城寨。
鄭保瑞生於72年，在澳門出世，一家人在他小時已來港，中學就讀聖芳濟書院，就讀過的名人有李小龍和許冠傑，但他成績不突出，後來轉往美孚地利亞完成中五。「放學嗰時會喺天台見到樓下有學生聚集講數，要等警車嚟，之後先至走。」
保瑞小時喜愛畫畫，中五畢業後曾做過設計絲襪的工作，後來看報紙廣告，見到製作公司請人，於是入行，自此便進入電影世界。起初的工作是做場記，抄對白，第一次任副導演的，是92年電影《她來自胡志明市》，當中有不少裸露場面，拍攝時只得導演攝影師和他，他還要負責替女演員補粉。
95年保瑞跟林嶺東拍攝《大冒險家》，見識如何認真拍電影，「林嶺東房裏面關於越戰同柬埔寨嘅書，多到不得了！」
接着鄭保瑞去了王晶的電影公司，半年之內做了五部電影的副導演，第一部就是劉偉強執導、鄭伊健主演的《古惑仔》系列第一集，當時由於不是現場收音，他要即場錄對白，然後給劉偉強聽，更要幫鄭伊健畫身上的紋身。之後他再幫手搞古惑仔第二集、兩部三級片，包括舒淇演的《玉蒲團之玉女心經》，搞完《運財至叻星》後，決定離開王晶公司。「嗰時做副導，導演問一陣要搵人撞爛櫃門，邊個撞？結果我撞，唔係推我埋去，係用櫈拍去我度，跟住自己撞埋去櫃度，嗰時我係不會say no！」
跟着鄭保瑞入了TVB，當時他25歲，見工是見監製潘嘉德。「做咗半年就冇做，始終電視台生態不同，佢哋加我人工，但我都冇做。我喺電視台寫晒我一世人寫嘅字，喺嗰度做要落好多單。」
那時葉偉信開拍《誤人子弟》，鄭保瑞就出來幫他。「的起心肝學創作，同葉偉信一齊度嘢。」但令鄭保瑞人生第一次導演，就是「中大電影創作室」，公司源自當年中大開電影課程，有一個學生頗富有，開了一間電影公司，專拍電視電影，可以用$44,000元拍45分鐘。「不如你俾$88,000我，我拍90分鐘！」結果鄭保瑞第一次做導演的電影《第100日》，就是如此拍成，再拍了《水着青春救生》、《摩登姑婆屋》和《發光石頭》，「中大電影創作室」拍的戲，部份更不會在戲院上映，只在電視播，或出VCD。鄭保瑞當年拍的《發光石頭》，已有他的暗黑風格，情節涉及亂倫，編劇是歐健兒，亦即現在《九龍城寨之圍城》的編劇。
「導演係一個職業，不是愛好，呢個係我嗰個時代訓練到的。」鄭保瑞之後連續拍了多套鬼片，包括《恐怖熱線之大頭怪嬰》、《熱血青年》和《古宅心慌慌》，「我對鬼片感應幾強，但當拍到自己都唔驚，我嗰晚就會返屋企熄晒燈，望住個廚房，望到驚，有感覺第二日再拍。當望廚房都唔驚，我就望房嘅天花板，望到驚為止，因為拍恐怖片最重要係自己驚。」
拍完這些鬼片，鄭保瑞覺得自己仍有不足，於是入銀河映像去跟杜琪峯，「喺銀河映像似返學！」他執導《意外》就拍了三年。「拍完第一日，我走咗去，離開香港三日，再諗點拍，重新寫過劇本。」接着再拍《車手》，「嗰時已經有《狂野時速》，我嘗試拍慢，基本上冇特技，八成係實景。」
「《車手》試過連續拍52個鐘，要轉攝影師，副導返到撲攤咗喺度，臨尾兩個鐘，我望住個mon已經睇唔到嘢，唔識嗌cut。有次八號風球喺街拍，杜生（杜琪峯）叫我收工。」
但令他陷入低谷的，是三套《西遊記》。「經歷好多，係唔成熟作品，第一次拍特技，拍嘅過程好災難，有一個美國投資商話可以去美國做特技，結果差不多兩年乜都冇做過，我去美國先至知道，結果要攞返嚟再做。到第二第三集，要減特技，對我來說係大打擊。」
《智齒》極好口碑，但票房欠佳，在香港只收220萬。「係傷感嘅，冇諗過咁差。可能見到海報一堆黑白，冇入場欲。」
鄭保瑞也曾拍過喜劇《追擊8月15》，和馬偉豪一起導演，編劇是《飯戲攻心》的導演陳詠燊。「我唔太懂得處理喜劇！」鄭保瑞除做導演，早期的電影更會見到他經常客串，也曾配音，杜琪峰執導《神探》中安志杰的一角，便是由他配廣東話。「最初我唔鍾意演戲，但覺得幾得意，做導演之後，我興趣大啲，因為我想了解演員點做戲。」
郭靖言
做過唱片公司，做過電影公司，做過報紙雜誌，如是者，現在全職睇娛樂，正經寫娛樂。
