【爆相爆片】傳溫哥華欠租兩個月 卓林秘密返港見阿媽

吳綺莉嘅19歲獨女卓林舊年出櫃，承認戀上加拿大籍女友Andi，搞到母女關係惡化，之後卓林更離家出走。

今年4月，卓林同Andi飛到加拿大過住顛沛流離嘅生活，聲稱無家可歸嘅卓林，更喺YouTube拍片尋父親成龍，之後，佢又俾人影到拖住買餸車到垃圾站，疑似「拾荒」，其後有消息指，卓林同Andi喺溫哥華居住其間曾經欠租兩個月，搞到俾屋主趕走。

早前曾發訊息俾香港十幾間公關公司，表示希望可以返港後獲邀出席活動嘅卓林同Andi，原來已經返咗香港喇。今日《蘋果》讀者Bobby透過「爆相爆片」，表示下午兩點半左右，喺銅鑼灣中央圖書館附近見到卓林同Andi，片中所見，着住白色情侶裝嘅卓林同Andi，好恩愛咁手拖住手行，不過Andi就喺衫外加咗件佢至愛嘅粉紅色外套。

讀者Bobby話：「佢哋講嘢好大聲，笑得又大聲，所以就留意到。佢哋一路行一路食煙，經過嘅時候仲聞到好大陣煙味。」

據知卓林同Andi係今朝返港，吳綺莉有安排同事接機。吳綺莉接受《蘋果》電話訪問時話：「係，我內地同事去接佢，仲返咗屋企同我坐咗一陣。」係咪安心咗？佢話：「可以咁講，我感覺到佢有長大，但唔可以用我嘅年紀去比較，慢慢嚟啦。」

問到卓林係咪返屋企住？佢話：「唔係，暫時唔返嚟住。（幫佢安排地方？）身為媽咪就覺得佢哋應該學習獨立，大家都18、9歲，每個人都有迷惘嘅時候，我諗所有媽咪一樣……但家門永遠為你打開。」吳綺莉說話含糊，但聽得出仲未接受到Andi。有指卓林同Andi喺溫哥華居住時欠租，問佢會唔會代交？吳綺莉話：「做媽媽，當然都有底線，佢朋友（Andi）都30幾歲，每個人都要承擔做事後果。」