【擺私事上演唱會】屢傳使女人錢 吳浩康豪語：你可以問番我每個女友

洪卓立同吳浩康（Deep）只此一場《他說他的故事》洪卓立x吳浩康演唱會，噚晚喺旺角麥花臣場館舉行，洪卓立女友湯怡、Deep爸爸同楊受成夫婦等捧場。立立同Deep輪流出場唱歌，中間加了鄧智堅做短劇，佢扮網民留言演繹出來，內容圍繞立立、Deep嘅新聞。

其中提到Deep使女人錢，Deep上台時話：「佢有錢唔代表我要使佢嘅錢。」立立話：「藝人拍拖同錢好似好有關係，大家講到好似同我好熟，分手一定係我錯咁。」

講到立立多次被傳死訊，Deep話：「聽落好笑，但畀人講嗰個人唔係咁好，如被講嗰個人係你識嘅、係你父母，你會有乜嘢感覺？」立立無奈話：「我唔知點澄清，我唔係死咗，最初有唔開心，屋企人都唔開心，最初入行，屋企人怕我畀人呃，又怕個仔得罪人。」

之後立立唱《回到最愛的那天》，鄧智堅又演繹片段，講述一對男女分手，男生去到邊，都拍片send俾舊愛，但女生不理啋，此時立立卻唱不下去，只90度彎腰，邊喊邊抹眼淚。

及後立立再唱《帶着骨灰去旅行》又係唱唔落去，Deep上台代唱一節，立立垂首搖頭。

Deep好多謝拍檔立立：「我從未試過有拍檔一齊做嘢，上台有人陪我唔使驚。」立立也話：「多年前我發台瘟，Deep教我只要用信念可控制身體，多謝Deep，做唔佢信念咁強，強到可以控制身體任何部份。」現場觀眾聽到笑，立立就話：「乜嘢人聽咪笑乜囉。」安歌時，Deep自彈自唱《醒覺》，立立則清唱幾句《回到最愛的那天》補數。

完騷後訪問，Deep話：「冇諗過真係可組成組合，好好玩，希望可以繼續唱落去。」立立就希望做巡迴，係咪包保唔喊？佢話：「我綵排睇到啲片都喊，我哋睇到眼濕濕，我知on show仲會激動啲，但點知真係控制唔到。」講到代頂唱歌詞，Deep話：「我係佢聽眾，我知嗰刻佢需要我喺度，我咪幫佢唱，知道呢part對佢重要，佢係最大感受。」「喊包」立立自爆：「每次唱《帶着骨灰去旅行》都喊，人越大越易喊，綵排又喊，聽番綵排自己唱又喊。」

立立話，現場播出佢啲旅行相，係同女友湯怡一齊去，但就冇揀有女友相，佢話希望湯怡睇番感動：「想令佢喊。」點解立立多謝助手都多謝女友？佢話：「我今日有多謝嚟嘅朋友，《帶着骨灰去旅行》首歌係多謝佢。」

短劇講番Deep被傳使女人錢，係咪屈咗好耐想發洩？佢話：「可以問番我每個女朋友，大家分開仲有冇錢銀瓜葛。有啲嘢好難解釋，騷裡面做嘅嘢等大家有共鳴，唔通我真係講兩句就能夠令大家明白咩？」

精選娛聞，喺晒《娛果》

http://fb.com/appledailyent