【支持港片】年齡相距40年冇代溝 陳靜邵音音成莫逆之交

29歲的陳靜（DaDa）和68歲的邵音音，兩位年齡相距達40載的女演員，她們經常合作，更成為莫逆之交。二人經常合作港產片，因她們有一顆支持香港電影的心。最近她們在電影《八步半之喜怒哀樂》中演首個單元故事《喜︰喜宴》，戲中她們雖然沒有太多驚嚇場口，不過這天二人應《蘋果》接受挑戰，首次玩VR遊戲（虛擬實景），始終薑越老越辣，音音姐表現淡定，相反DaDa看到畫面有喪屍，未玩先尖叫，要音音姐出手相救。

DaDa和音音姐，近年經常在電影中合作，二人都不約而同表示︰「哈哈哈！好多次，起碼五、六部。」講到默契，DaDa說︰「絕對有，每次佢都係做人哋阿媽，我好想有機會佢做我阿媽，而每次音音姐演嘅阿媽角色都好唔同，佢好百變。」今次在《八》片中，音音姐飾演張繼聰阿媽，更是DaDa的哎吔奶奶，音音姐抵死地說︰「我就係佢夢中嘅奶奶，如果有一日佢結婚，一定好鍾意我呢個奶奶。」DaDa也興奮說︰「佢日日新鮮，我一定唔會悶，仲一齊打牌，又可以講人是非。」說罷兩人雙視而笑。

兩人雖然年齡有距離，卻能成為好友，音音姐說︰「我同佢係付出真友誼，雖然年紀唔同，成長時代唔同，但面對電影界困境、開心唔開心同人際關係，私下我哋係真心做朋友，因為我哋好善良，係好人。」音音姐還提起幾年前的金像獎，她說︰「我哋同一部戲入圍女配角，雖然佢攞咗，贏咗我，我同佢借半年攞返屋企擺。」

與後輩相處沒有代溝，音音姐笑言是她的生命力，「係緣份，唔係冇人搵你拍，我咁嘅年紀一定唔係做主角，佢先至啱觀眾睇，哈哈我又搲撈。」DaDa自模特兒轉型做演員，她說︰「我好感恩，好多人問我尺度係咪改變，其實我冇，冇話自己喺咩位置，拍戲我首選港產片，不論大小製作，香港嘅文化遺產係要守護。」音音姐聽後讚賞DaDa，「有支持香港電影嘅心，係好重要，係真心去支持香港電影，我哋係拍畀香港人睇。」

二人除了支持港產片，這天也來支持本地創作的VR遊戲。首次玩VR的DaDa和音音姐，穿上VR裝備時既期待又緊張，當她們看到自己進入遊戲時，音音姐好談定企在原來位置，相反後生女的DaDa，不時叫嚷着。原來DaDa很細膽，多年來只拍過一部恐怖片，所以當她看到VR遊戲入面，一群如喪屍的敵人出現時，她已不停尖叫。其後DaDa不敵被喪屍包圍，她大叫︰「音音姐救我呀！」音音姐二話不說用武器射殺喪屍幫她解圍。玩完VR遊戲後，DaDa雖然驚，卻直呼好玩，仲話在萬聖節前夕，再約音音及朋友要玩多次。

採訪︰羅婉玲
攝錄︰廖達燊
化妝︰Pinko.C（DaDa）
髮型︰Jack Hung（DaDa）
場地︰SANDBOX VR