【暗撻「變臉」空姐】關楚耀暖男上身護女友：佢係一個普通女仔！

藝人拍拖離離合合特別受關注，洪卓立日前宣佈同拍拖11年嘅湯怡分手，令不少人的童話夢碎。雖然，立立強調自己仍然相信愛情，但他重提這段逝去的愛情時傷心流淚，真係見者心酸！

不過，仍然相信愛情嘅，其實仲有關楚耀（Kelvin），喺情場上跌跌碰碰，感情多次觸礁嘅Kelvin，一直無畏無懼尋找愛情。09年和衛詩分手後，翌年便有圈外女友Megan Lee，然後16年再戀上韓國索模Miu Kim，可惜都係分手收場。

唔駛擔心！原來Kelvin回復單身後，已火速投入另一段感情，新女友名為Joann Law，曾任模特兒嘅佢，現職空姐。據知，Kelvin和Joann秘撻近一年，兩人感情發展一日千里，Kelvin經常都會做跟得男友，陪女友一齊飛，但為免戀情曝光，Kelvin都好小心，即使在社交網貼外遊相，都不會和女友同一時間上載，避免引起懷疑，相反Joann不時都會上載新照，又經常有意無意提及自己有男友。

早前Joann去了東京旅行，一連幾日都有喺Ig貼相，其中一輯攝於主題樂園嘅單人照，佢就留言「分享一位很會拍照的男友 他的作品 #你就是我的開心樂園」，其間Kelvin都有喺Ig上載攝於澀谷嘅相，但就只影環境，自己並無入鏡。但係，紙始終包唔住火，Kelvin同Joann各自在Ig貼出攞住同款相機嘅照片，最終令戀情露出馬腳。

其實，今年2月14日情人節，Joann上載一張攝於馬爾代夫相已悄悄洩「蜜」，雖然張相只有佢一個人，但佢就留言話「謝謝他讓我成為幸福小姐一次Happy Valentine’s Day my valentine」大晒幸福。當日Kelvin就借愛犬過橋，上載一張抱住愛犬嘅相，然後寫「放閃情人節Happy Valentine’s Day」冧女友，呢張相Joann都有讚好。至於攝於馬爾代夫嘅環境照，Kelvin等足7個月，今年九月才上載。

就新戀情《蘋果》聯絡過Kelvin，佢即暖男上身，處處維護女友：「自己都長大咗唔少，所以對於感情事嘅處理，會嚟得低調啲。」問到兩人拍咗幾耐拖？Kelvin無正面回答，只係話：「我哋係了解當中，同埋佢唔係娛樂圈嘅人，係一個普通女仔，有正常工作，正常生活，唔希望花邊新聞影響到人做嘢，所以希望文化界、網絡界、傳媒界都可以高抬貴手，唔該晒。」