【浮誇露牙肉】吳若希晒合照冇菊梓喬 網民：專登唔影一姐

噚晚大台「十大勁歌金曲頒獎禮2018」，出道只有2年嘅菊梓喬（Hana），首奪最受歡迎女歌星獎，當宣佈一刻，吳若希笑到牙肉都露晒出嚟，睇表情比菊梓喬開心十萬倍，佢呢個浮誇式嘅笑容，唔知係真心恭喜定暗暗取笑呢！雖然成晚兩女坐隔籬，但幾乎全程零交流，當吳若希憑《無常春秋》攞金曲獎時，佢攬胡鴻鈞都唔攬星夢一姐菊梓喬，似乎不和到出晒面。

身為星夢大師姐嘅吳若希，今次輸畀樂壇新丁菊梓喬，佢喺社交網貼咗一張合照，有胡鴻鈞、譚嘉儀、石詠莉、作曲人張家誠等，偏偏就係冇本來坐旁邊嘅菊梓喬，吳若希寫道：「真心開心既（嘅）」冇錯，佢呢個笑容係真心開心，同知道菊梓喬攞最受歡迎女歌星獎嘅浮誇笑容兩個樣。

識睇一定睇留言，眉精眼企嘅網民紛紛問：「專登唔影一姐？」、「不和呀不和呀～一姐同連姐呢」、「頭先Hana拎最受歡迎女歌星嗰時，你笑到見牙唔見眼。」、「算啦，個獎都無晒代表性，你攞同一姐攞都係得淡笑㗎啦。」可能心水清嘅網民留言太抵死，吳若希之後再刻意po多張星夢歌手大合照，就有齊菊梓喬、連詩雅、周柏豪。

之前因為吳若希嫁人兼生B，星夢硬谷新人菊梓喬攝位，幾乎所有劇集主題曲都畀晒佢唱，噚晚仲造就佢攞女歌手獎，而呢個大獎往年嘅得獎女歌手，係梅艷芳、王菲、葉蒨文、陳慧琳、彭羚、鄭秀文、楊千嬅、容祖兒，粒粒都係天后級人馬；但睇番菊梓喬今年嘅成績，除咗稱霸大台頒獎禮之外，只在新城勁爆頒獎禮憑《只想與你再一起》獲勁爆歌曲獎，而在商台叱咤同港台十大中文金曲頒獎禮都捧蛋，有網民留言恥笑：「誰還會想在香港做歌手」、「入行兩年就攞到咁兒嬉」、「呢個只係電視台傑出員工頒獎禮」、「其實夾硬谷佢上神枱係害咗佢咋」！