【無晒矜持】劉德華自爆傷後入院大力揸護士：我嗌咗三秒！

劉德華早前應商台DJ Vani邀請，接受佢主持嘅節目《雲妮鍾情》訪問。節目今晚播出第二集，華仔繼續講到佢拍廣告墮馬嘅事。Vani問佢點刻服心理創傷？華仔笑住話：「唔使克服o架，以後唔騎就得啦！之後佢又講笑：「不過我就特別啲，我墮馬吖嘛，咪唔騎馬囉，如果話仆親以後唔行就麻煩，墮馬我以後唔騎就冇事。」

不過，今次受傷嘅痛楚，華仔話係咁耐以嚟最痛一次，佢憶述喺醫院轉床一刻，訪問其間都忍唔住笑。華仔話：「啱啱喺飛機返到嚟，喺機上有好好麻醉師，我迷迷糊糊咁，佢叫我痛就叫佢，但去到醫院等咗大約兩個鐘，麻醉藥過咗就要過床去照磁力共振，嘩！唔知嗰個護士會唔會鬧我，我一轉身，嗰種痛我真係無辦法，我喺佢右邊個手瓜一揸就揸落去，我嗌咗三秒，但係佢好冷靜咁叫我定啲嚟，嗰個護士好後生，我諗啱啱新護士，我痛到冇晒矜持。」

華仔又話後悔自己喺醫院半年就出院，早知返入去，因為好唔方便。佢話：「喺apartment住兩個月，好儍，寧願喺醫院，又返唔到屋企，因屋企有28級樓梯，醫生話我唔可以自己用拐杖上樓梯，之後做物理治療有個行40級樓梯嘅programme，行到就可以走，所有嘢都一步步嚟，即係如果我想抱BB，BB 20kg就要拎20kg嘅嘢練習。」華仔話經過嗰次，更加知道每樣嘢都要適應，你唔適應，你個安全區會越來越少，人生每日都有新嘢，慢慢累積返嚟。

之後，華仔自爆因為好驚火燭，所以買樓一定買地下，租屋最多都係三樓，但都覺得高。佢笑住話：「以前自己一個人住廣播道，都會諗如果火燭我會喺呢個窗穿出去，再咁爬落去，然後啲身份証放床頭櫃，因為我以前習慣着內衣褲瞓，o依家唔敢喇，我着睡衣瞓，驚隨時要行出去吖嘛！」

工作方面，華仔形容自己係樂天，有project會好嚴謹，但係攞唔到想要嘅嘢都冇所謂：「我記得有年攞唔到最受歡迎男歌手，大家覺得世界跌落嚟，但自己覺得（攞）第二有乜問題啫，唔係最啫！」但係佢話自己唔係乜都唔諗：「一定會諗，好似自己會諗，有一日如果要騎馬，你騎唔騎？要去計劃，冇話一定騎，你咪諗吓有乜方法，好似喺台上想自己高啲，咪搵啲矮啲嘅舞蹈員囉！」

華仔又話以前20幾歲，睇世界無咁長遠，嗰時只會諗自己40歲仲拍唔拍戲？又諗吓搵到300萬就走，見到有啲同期未得到欣賞識，仲話自己搵到4000萬，一人1000萬，搞到Vani都大笑。

講到近日好多生離死別，華仔指40歲開始身邊就有人走，面對方法係覺得傷心就傷心，唔會故意堅強：「當一個人有80歲，你就預咗身邊熟悉或者愛嘅人會離開、生病，但同自己差唔多年紀走，觸動會大啲，好似當年好友簡偉安鼻煙癌走，會覺佢唔食煙，反而當時自己仲食煙，但人嘅生命有時就係咁，係咪無常呢？唔係，係唔知幾時發生，雖然o依家驗DNA已經可以知，只係唔可以畀你知，因為會影響全世界好多嘢，會亂晒！」