【狗仔出更】銅鑼灣做保安員 李中寧孤單搵食

63歲李中寧曾經係無綫「銀河十星」之一，亦係葉童（原名李思思）同父異母嘅哥哥。廿幾年前息影，去咗英國生活，曾經開過餐館，不過生意失敗，幾年前回流返香港，考到保安牌之後，就一直做緊保安工作。

前年，李中寧被發現喺北角做停車場保安員，比起以前做「銀河十星」，明顯發胖，塊面仲有白蝕，當時佢接受《蘋果》訪問時，係咁樣形容自己：「年紀大，腦退化。生意失敗，年老無依，做緊份最低工資，夠餬口。」

日前，李中寧又被發現喺灣仔、銅鑼灣一帶現身，大約中午兩點幾，着住一身黑色制服，腰纏黑色腰包，肚腩都唔細，明顯比前年又肥咗，不過走路時好輕快，睇嚟身手無減弱到。見佢喺駱克道一帶搵食，周圍行，周圍望，喺十字路口位，行出行入，經過平民茶餐廳燒味店，停低望廚窗貼住嘅食物圖片，但又心大心細，唔知食咩好咁款，跟住又行咗去望其他食店嘅餐牌，考慮咗好耐，揀咗幾間之後，最後決定幫襯一間連鎖快餐店。

走入餐廳，望完餐牌一輪之後，李中寧拎住張50蚊紙準備排隊落order，點咗碟排骨炒麵，就企埋櫃台前等，拎到食物後就捧住個餐走埋去角落對窗位，唔知肚餓定趕時間，食得好急，間中望下手錶，但食食下又拎部手機出嚟「送飯」，好快就解決咗個午餐，其實揀食咩仲耐過食呢餐。醫飽肚之後，李中寧就急步行去銅鑼灣某商業大廈，為一間發展商旗下嘅保安部門擔任保安工作。