【相敬如賓?】吳若希4招玩殘老公 自揭火爆真性情
「火辣」人妻吳若希(Jinny)真係好鍾意「分享」私事,經常毫不避忌公開鬧老公Alex,依家仲索性拍片「逼老公做愛做的事」!話說佢最近終於開咗影片頻道,頭炮就係「相敬如賓周」,大家唔好諗衰嘢,佢話:「因為為咗夫妻和睦,所以每個月都會Set 1個星期,就係我同我老公之間要相敬如賓!」嗰日Alex就應承佢全日都要「Say Yes」!
先嚟第1個挑戰,就係修鼻毛同擠暗瘡!Jinny大聲用普通話呼喝「寶貝」2次叫老公出場,當Alex聽到老婆叫佢「攞埋擠暗瘡嗰支嘢出嚟」時嗌唔好,Jinny立即火起瞪大雙眼:「冇得Say No呀今日!」之後進行中嘅時候又爆l「今日我話事呀,嚟咩啫你!」跟住佢補飛話自己「真係好欺文、賢良淑德」時,都忍唔住笑!
而第2個挑戰係公主抱,Jinny要好似影結婚相嗰時頭髮飛起,又唔可以太快,又要好似英女皇咁轉圈,可以同大家Say Hi,要求多多,但Alex都係默默接受!到第3個挑戰,Jinny就假民主叫老公揀做掌上壓或仰臥起坐,最後都係由佢決定做前者,又不斷咁騷擾老公!
而最後就係做家務,連Jinny細佬都叫姐夫幫手洗碗!不過Alex終於顯威風,竟然瞓喺床到打機,不過喺老婆淫威之下,Alex都屈服,求其吸吓塵交貨!Jinny又突然問老公:「我肥唔肥呀?」Alex就答:「肥!」搞到Jinny睥到佢行,Alex就好認真話:「你話All Day Yes嘛!」搞到老婆又嬲又笑,唔少網民睇完就大讚好笑「Keep住做💪🏻長做長有」、「Jinny露出真性情」、「會唔會有一集係何生玩番Jinny」!