【窮人只有看戲的份】王菲帶12歲李嫣掃名牌 兩粒鐘豪使10萬炫富

王菲同前夫李亞鵬所生嘅女兒李嫣已經12歲，最近網上流出一輯李嫣同兩位小閨密掃名店嘅相片，據知上月尾係王菲帶咗三位小女孩嚟香港掃名牌，短短兩粒鐘就豪使10萬元！佢哋仲喺社交網晒戰利品炫富，包括逾萬元手機、名牌腰包、潮牌衛衣…果然同人唔同命，有網民就留言：「不得不說投胎是個技術活，我等窮人只有看戲的份！」

李嫣兩位小閨密都大有來頭，一位係汪峰同前妻葛薈婕所生嘅大女「小蘋果」，另一位叫周巴黎今年13歲，在上海貴族學校讀書。上月尾周巴黎在微博晒在名店拍攝嘅合照，有眼利網民認出李嫣同小蘋果，而相片左角仲見到有個女人用手機影佢哋，估計就係陪購物嘅王菲啦。三位小閨密着短裙騷幼細長腿，佢哋被網民封為「腿精」。

中秋節前一日，網民就影到王菲同李嫣現身香港嘅相片，佢哋下榻中環一間酒店嘅套房，每晚房價盛惠約$5,700元，但周巴黎卻「嫌棄」酒店早餐唔好食！之後佢哋又搭私人飛機去澳門，咁啱謝霆鋒喺澳門工作，估計王菲帶埋囡囡去澳門陪霆鋒過節。

周巴黎又貼出坐私人飛機相，有網民以為私人飛機係佢爸爸嘅，不過周巴黎回覆網民澄清：「不是我家的私飛啦，只是我爸爸包了一架飛機飛去澳門而已。」