【紓喪父之痛】感激男友充當守護神 沈卓盈：認定揀啱就一生一世

家庭是沈卓盈的避風港；男友則是她的守護神。

有了這兩樣法寶，令沈大師下定決心，離開工作了16年的娘家無綫向外闖。

沈大師表示下決定不易，思量了足足一年，獲家人及男友全面支持。每次遇上難題，她總會跟大家姐、媽咪及家族經營內衣褲出口生意的男友Calvin商量，離巢的決定，也是三票通過。「佢哋贊成我決定嘅任何事情，尤其係屋企人，佢哋由我第一日出嚟做嘢到o依家，無論我遇到乜嘢問題，佢哋都表示支持。」沈大師痛錫家人，很多時報喜不報憂，她說：「我係性格比較獨立同tough嘅女仔，可以解決到，都想用自己方法，唔想煩到身邊朋友或親人，唔想大小二事都要去麻煩人，人大個咗，自己嘅事自己解決同處理，唔係每個人都想去接收我嘅負面情緒，我只希望將自己開心事同大家分享，送出我嘅正能量，唔開心留畀自己就夠。」

「遇到失意，我會對住所有人笑，特別係媽咪，唔想佢擔心，佢成日好擔心我，怕我唔夠瞓、食得少，成日話點解我咁瘦，所以一有事，我會自己收收埋埋匿埋喊，夜闌人靜匿埋喺房喊。喊完一晚就冇事，第二日又一係條好漢，可以由頭嚟過。入行咁多年都係咁，喊係我一個好好嘅發洩方法。」不過，再堅強的沈大師，都需要男友Calvin的肩膊，「男朋友有見過我喊，係傷心情況。」沈大師不認同男友是「靠山」，她說：「男朋友係我嘅守護神。無論發生乜嘢事，佢都會第一時間出嚟撐我、保護我、支持我同鼓勵我。」男友會攬着沈大師呵護嗎？沈大師甜絲絲說：「佢會做。」

沈大師於2016年3月被《蘋果》踢爆孖新歡銅鑼灣吃雪條，當時的四眼男正是現任男友Calvin，兩人拍拖3年多，感情穩定。「2016年、2017年同2018年，呢三年對我嚟講係好難忘，16、17兩年係一個好傷心時間，18年係一個恢復時間。16年經歷咗爸爸患病，17年爸爸走咗，呢件事對我打擊好大，好傷心、好悲痛，爸爸係我好尊敬嘅人，好唔捨得佢，佢病同離開對我嚟講係一個打擊，爸爸係我最愛嘅男人。呢段時間全靠男朋友喺身邊畀我好多支持同鼓勵，過去呢兩年，我幾乎晚晚都喊，呢段時間佢晚晚聽我呻，安慰我。佢係我精神支柱，無論我開心或唔開心，佢都第一時間喺我身邊，聽我分享。19年對我嚟講，係時候重新開始。自從屋企人離開，我明白到生命無常，有嘢想做會想盡早去試吓，唔知自己下一刻仲有冇機會去試，喚醒我對人生睇法。」

既然身邊已找到守護神，那今年要把Calvin私有化嗎？「我同佢一齊，大家已有共識，向住同一個方向行，做嘅話都係timing時間啫。我好專一，感情對我嚟講，冇嘅時候，寧缺勿濫，認定揀啱就一生一世。呢刻可以講，我哋感情好穩定、好開心，佢畀咗我好大支持，令我喺事業上可以做番自己，基於呢種原因，我可以畀機會自己，嘗試跳出保護區去挑戰唔同工作。」

採訪：比華利
場地提供：六公館