【結婚一定公開】心穎想爸爸快啲睇到婚禮？ 馬明：佢冇同我講過喎

馬國明同羅霖今日到佐敦為火鍋店開張做嘉賓，馬國明早前在澳洲被捕獲，出席黃心穎家姐婚禮，同女友心穎BB行街好sweet，幫女友拎手袋之餘又同女友家人合照，好似溫馨一家親情景一樣。

馬國明話在澳洲都好急趕，連埋飛機只逗留三日，因為要趕返香港開劇，同女友心穎好甜蜜，佢就話：「咪又係咁，其實好簡單參加朋友婚禮。」唔少網民見到佢哋咁sweet都催促佢哋快啲結婚，馬國明就話：「其實世界好細，心穎三家姐係我侄女朋友，而我侄女即將生BB，飛唔到過去，我過去做埋代表。」心穎曾經透露因爸爸年長，希望讓爸爸快啲見到佢結婚，馬國明一聽到就話：「佢冇同我講過喎，佢話唔想咁快，我感覺佢都想喺事業再衝下先。」

馬國明好有風度幫心穎拎手袋，佢解釋：「其實佢唔鍾意男仔幫佢拎手袋，只係有時街上有人搵佢簽名，我就幫佢拎住，嗰刻可能有人搵佢影相我就幫下佢。我唔介意幫女仕拎手袋，平時同媽咪去街我都係咁拎，曾經聽人講過話幫女人拎手袋嘅男士冇出色，但我唔覺得，都要睇下咩時候。」

此行會否在澳洲都秘密結婚？馬國明堅定語氣話：「一定唔會，唔會發生喺我身上，結婚係光明正大事，點解要咁秘密呢，相信如果有一日我結婚嘅話，會同大家講，唔會幾年後先畀你哋知道，可能有啲人有隱衷，但我冇。」

羅霖今晚會出發去以色列朝聖，出發前都做到盡賺到盡 ， 佢話今次第一次放低小朋友去旅行，之前都安頓咗好多嘢，希望旅程可以去啟發心靈，真正休息。羅霖話：「今次已經係第三次為同一間食店剪綵，商戶話我腳頭好，希望旺人亦都旺自己，對飲食業都有興趣，有意投資火鍋店。」