【羨慕朋友有得揀】被指靠關係拉攏角色 百億千金蔡頌思：一度質疑自己

現年25歲、百億千金蔡頌思(Jocelyn)是已故海產大王蔡繼有孫女、新華集團掌舵人蔡冠深二女，Jocelyn醉心演藝工作，5歲起已踏上舞台。中大英文系畢業後，曾經到爸爸公司工作，但性格好動的Jocelyn不甘承繼家族生意的命運，她選擇冒一次險，加入娛樂圈一嘗當演員滋味。

Jocelyn日前在北角接受《蘋果》訪問，她說：「細細個開始做好多drama，興趣班開始、上中學，到大學劇社，當時大家都好認真，已經唔覺得係玩，其實冇諗過將呢一樣嘢變成事業，讀書時只係得返學同做戲兩樣嘢，臨大學畢業前好迷惘，啲中學同學問我點解唔試吓做演員呢？當時冇諗過係一個可能性，但係都想趁後生試吓！之後開始casting，咁就開始咗我嘅第一部電影。」

Jocelyn現時已經拍了3部電影，最近在新戲《家和萬事驚》飾演袁詠儀和吳鎮宇的女兒，雖然拍戲要捱夜，但Jocelyn感受到拍戲時真正的「執生」技巧、共同創作跟團隊精神，Jocelyn大感刺激兼滿足，獲益良多。提到入行經過，Jocelyn說：「最初我係先同媽咪講，佢覺得我講笑，但係見到我越做越多，最後接受咗。爹哋媽咪覺得我喺溫室長大，點解要出去做啲咁辛苦嘅嘢？佢哋始終想保護我，如果喺公司做嘢就可以成日睇住我，但係聽到拍戲就會覺得好辛苦，我反而覺得可以做自己鍾意嘅嘢，一啲都唔會覺得辛苦！」

蔡氏家族生意涉及海產、地產和金融等等，家族總要後繼有人，但Jocelyn偏偏選擇加入娛樂圈，令她增添不少家族壓力，Jocelyn說：「我係幸運嘅一群，屋企冇經濟壓力，不過亦因為呢個原因，有好多人哋唔明白嘅辛酸。屋企對我嘅期望好高，有時做得唔好會有說話，或者畀壓力妳、會比較，係在所難免。我身邊好多朋友嚟自普通家庭，反而有更大自由度，做自己鍾意嘅職業，冇包袱，因為佢哋nothing to lose，隨時唔得就做過第二份工。」她續說：「但係我做呢個選擇，聽過好多唔同嘅說話，好多人都會問點解要咁做？佢哋會覺得對屋企要有責任，作為一個女，要孭起啲責任，好多呢啲壓力，反而我會羨慕身邊嘅朋友，佢鍾意旅遊就去做空姐，呢個係我冇可能做到嘅職業，見到佢哋有選擇自由，所以有時你睇我好，我睇你好。」

其實Jocelyn的家庭背景，難免會受人背後指指點點，她坦言曾經被指靠人脈關係得到角色，而心情陷入低潮，Jocelyn說：「喺香港話劇團得到一個有名嘅角色係好困難，我冇受過專業訓練，入選係非常不可思議，嗰次係好彩，畀張達明導演揀咗我，之後聽到有人話係因為屋企嘅背景關係，其實完全冇關係，我係靠自己同運氣，好彩嗰日參加咗個遴選，所以我覺得好幸運，係天時地利人和。」不過，聽到有人覺得她靠人脈關係，Jocelyn都有一度質疑自己：「有段時間好低落，不過有前輩鼓勵我，叫我唔好放喺心，呢個圈有好多謠言，聽咗就算，最緊要做好自己，我唔應該咁介懷，做好自己就得！你鍾意點講就點講啦，冇所謂。」問到Jocelyn會否努力做出成績，爭番口氣？她笑說：「盡量啦！事情係冇絕對嘅，可能而家好好彩，之後乜都冇，屋企就會畀說話我聽，會話呢行唔穩定，就止步咗，會叫我返去，唔可以講到咁美好，事實上努力都未必有成果，順其自然啦。」

踏入娛樂圈，Jocelyn為的是努力圓夢，她把握任何演出機會，稍後Jocelyn將參與劉松仁身兼策劃、導演和編劇的音樂劇《利瑪竇》，屆時她要唱歌和跳舞，她說：「我12歲開始參加學校dance team，一直鍛鍊跳舞，跳出嚟唔止要好睇，仲要練番基本功，而家跟老師學Lyrical Jazz，希望可以有好表現。」至於對將來的夢想，她不諱言希望能夠演活每一個角色：「人係會好容易跌入最舒服嘅狀態，如果做一啲同自己年紀、性格近似嘅嘢，好快我就會懶惰，我想演一啲同我本身好唔同嘅角色，呢個就係鍾意做演員嘅原因，我會努力去探討同揣摩，對我嚟講係好有挑戰。」

採訪：羅慧敏
攝錄：廖達燊
場地提供：Dance Union