【自傳式訪問】教范曉萱掹腋毛 大S親解同阿雅斷交
大S徐熙媛最近接受大陸雜誌自傳式訪問,除咗詳談自己入行以來嘅心路歷程,更重要提及佢一班圈中嘅好姊妹,好似細妹徐熙娣(小S)、范曉萱、Makiyo等,呢班姊妹眼中嘅大S唔單止係仙女、漂亮、公正,仲會為佢哋排憂解難,主持正義。除讚美大S,姊妹們仲有害怕嘅感覺,Makiyo就話唔係怕大S,係怕大S唔開心,如果大S唔開心,Makiyo就會怕怕。
喺姊妹眼中,大S係個「緊繃、死撐、放不開」嘅人,極少喺人面前暴露自己嘅難過。同大S相識23年嘅好友范曉萱,回想大S點滴,范曉萱話大S難過時,係佢覺得某件事佢未做得好,譬如係角色冇演好,佢會好自責,佢難過都是在自責。
范曉萱又回憶當時只得18歲嘅自己,曾對女性點處理自己腋毛而困惑,佢喺綜藝節目《龍兄虎弟》後台遇到大、小S,范曉萱就去問兩姊妹,點樣處理?大S竟然話用拔嘅方法,范曉萱心想終於有個唔同嘅答案,仲預感大家會成為朋友,而到今時今日,范曉萱都係用緊呢個拔腋毛嘅方法。
回想少女時期,范曉萱形容大S嘅房間媲美精品店,衣服、鞋襪、護膚品都井井有條,范曉萱透露大S係佢哋姊妹中最成熟,佢相信一半係天性,一半係成長過程,大S喺家庭中,係扮演一個決策者。對於大S長期要keep住瘦,范曉萱曾勸過大S,做咗40年瘦人,後面就應該轉變,做個開心有點肉嘅女生。而范曉萱每次提到自己,已年過40歲有唔同嘅感覺,大S就唔回覆佢,直接KO呢個話題。
訪問中又提到,佢同阿雅(柳翰雅)嘅絕交經過。話說當年大S拍完《流星花園》後,因壓力太大及太攰,所以臨時甩底要錄影嘅《娛樂百分百》。不過大S話佢甩底前,其實都有做足準備,佢先發短訊俾住喺隔離嘅阿雅代主持節目,而且仲企喺阿雅家門前,聽到確認短訊嘅聲音,點知阿雅最後都冇去到,成晚得番小S喊住主持節目。大S表示,當佢打開電話時,發現仲有好多電話未接、小S更喺留言狂喊,而佢就喺重播中,睇住到小S喊住主持節目。搞到咁大件事,大S隔日就先同大家道歉,然後再就同阿雅絕交。