【自己創造機會】衛詩雅自覺仍是影壇新人 為拍電影直認搲撈

以前電影業蓬勃的年代，演藝界經常流傳一句說話是「唔好放過任何一個機會」。時至今日，每年開拍的港產片寥寥可數，入行11年的衛詩雅身在其中，坦言若果演員處於被動狀態，換來是苦等不到機會。她選擇主動問公司、問導演會否有演出機會，還直認「我係搲撈」，全因現今市道是要自己創造機會，若果不努力爭取，又怎能證明自己有多愛這份工作。

踏入娛樂圈第12個年頭，衛詩雅坦言時間過得飛快的同時，仍覺得自己是影壇新人，令她有這錯覺是來自兩個原因，第一是近年合作的演員都是前輩級人馬，令她有種新人感覺。另外是每次開工都抱着一團火，一團新人對電影好奇的火，她雀躍地說：「我每次臨出門口開工都覺得好似去玩咁，拍戲過程係玩，等埋位先覺得係開工，我好好彩，可以搵到熱愛嘅嘢作為工作。」

演藝興趣並非從小培養，求學時期從未參與過任何話劇演出，真正接觸演戲是踏入娛樂圈時參演《四葉草之盛裝舞步愛作戰》開始，她笑說：「估唔到一試愛上，我自細就好想每份工作都試吓，做過售貨員後，又想做吓文員，又諗過要同中國人打工，同美國人打工，有種心態係想盡量去試，點知發覺演戲原來仲可以乜都試，今日做完律師，聽日做賊。」

過去11年的演藝路，衛詩雅從心底講出一句是難行的，她說：「諗番轉頭，我好慶幸自己有高同有咁低得咁低，不過仲未有一個好鍾意，能夠係代表作嘅角色出現。」回想低潮期，衛詩雅似乎忘記得一乾二淨，她哈哈大笑說：「我都唔係好記得，唔開心咁度過，我唔係好報憂，尤其是對住屋企人唔會講，我幾唔想佢哋擔心，同唔想佢哋知我唔開心，所以我媽咪好擔心呢樣嘢，佢破解晒我全部密碼，佢係一位好叻嘅偵探，好犀利，大家要搵偵探可以搵我媽咪。」她感激家人多年來默默支持，不論讀書時成績好不好，只要有盡力去做便不會責罵，讓她放心去追尋自己的夢。

面對近年電影市道低迷，身為電影演員的她，絕對贊成主動爭取工作機會，她說：「我會自己打返公司，我好想拍戲，公司有咩戲拍，咩角色我都拍，我試過打畀導演，導演你係咪開緊邊套邊套，我嚟拍一個角色，客串都得，就算可能無得演，我都會試過問導演可唔可以嚟現場幫手，喺現場我就好開心，我好鍾意睇人演戲，當然我都好鍾意演，畀我做工作人員我都好開心。」即使在現場，她也會留意幕後工作人員的工作情況 。

在演藝圈採取進取態度，難免被人覺得是搲撈，令其他同行誤會，衛詩雅淡然說：「如果你覺得我搲撈，我又覺得無乜問題，我係搲撈嘛，而家呢個年代，你唔去問，人哋又會唔記得你，咁我覺得我係，我無所謂，我唔會打咗呢個電話，『導演可唔可以搵我？』轉個頭話我冇打，我唔會，我會周圍講係我自己打電話講要嚟演。」她覺得以前的年代是不應該放過任何機會，現今是要創造機會，尤其年青一輩更應該去創造機會給自己，她說：「等機會到，反而唔夠積極，你又有幾鍾意、幾想做呢份職業、幾想演戲？」她看到近年電影市道，每年開拍電影有限，加上有一半是合拍片，女演員演出的機會可謂更加微乎其微，她自知並非有知名度，會獲片商或導演垂青，所以積極爭取才是應有態度。

嬌滴滴的衛詩雅內裏充滿一份野性，這份野性是一種不怕死，渴望挑戰極限的心態。以往甚少北上發展機會，衛詩雅早前到江門三個月接拍新劇，令她一嘗演藝生涯中最驚一次，她說：「咁多年，我都冇乜嘢真係驚，不論開槍同吊威吔，不過今次估唔到咁驚，有一幕係要我喺二樓跳落地下，有戴威吔，但無乜力畀我，真係跳落架車度，又完全冇墊，武術師傅話咁樣跳係唔會死，所以唔使驚。」初時她還未懂得驚，睇位時還得戚地提議不如從三樓跳下，直至真正開拍前試跳一刻，她說：「原來好唔同，好驚，未試過咁驚，驚到個人震係停唔到，11年來最驚嘅一次。」拍攝完當晚，她覺得非常興奮，因為終於找到一份驚的感覺。

她直認愛挑戰極限，正如去年「山竹」吹襲香港時，原來她的住所被吹至近乎倒塌，她說：「嗰日發生嘅事好似災難片咁，啲石屎又冧落嚟，原來當驚到極限時會異常冷靜，會好清楚自己做緊乜，唔會喊。當一切過晒之後先識喊，喊唔係因為無咗間屋，係所有嘢終於過咗。」這一點點人生經歷，豐富了她的資料庫，她表示有助將來演出更逼真的感覺。

採訪：馬建華 拍片：馮嘉銘
鳴謝場地提供：The AIR （The ONE）

衛詩雅真正接觸演戲是踏入娛樂圈時參演《四葉草之盛裝舞步愛作戰》開始衛詩雅真正接觸演戲是踏入娛樂圈時參演《四葉草之盛裝舞步愛作戰》開始