【走過死亡邊緣多謝老父】如果有一日唔喺度… 顏仟汶：火化後撒公園

你認識顏仟汶有幾深？

現年47歲嘅仟汶入行29年，佢做過亞視，亦做過無綫，係杜汶澤舊愛，拍過半百套三級片，早年淡出轉行，08年同跟圈外人阿Lo結婚，16年分居，近日跟人夫詹秉熙爆緋聞。仟汶走過嘅人生路崎嶇起伏，四年前仍未離婚時，卻爆發抑鬱症，但佢積極面對醫治，至今仍要定期到公立醫院覆診。

仟汶日前接受《蘋果》專訪，大方分享自己情況，「我成日覺得乜都好，有病要睇醫生，唔係自己暱埋諱疾忌醫。」仟汶兩年前分居，對當時已係抑鬱症嘅佢嚟講，打擊唔算大，「我哋一齊15年，去到分居離婚，唔係突然間，一定兩人相處出咗問題，有啲位唔可以繼行，唔可以因為我有情緒病，要對方夾硬遷就我。」分居兩年，仟汶今年5月簽紙離婚：「動筆嗰吓係有感覺嘅，唔捨得一定有，基本上好了解，大家磨合晒，行唔到落去係可惜，有嘗試可唔可以重頭嚟過，但返唔到轉頭。今時今日大家仍有溝通，發覺一切已過去，佢都拍拖啦，我祝福佢，每一個人，人生遇到邊個人都係緣份，相信佢都想我開開心心。」

回復單身，仟汶獨居新界村屋，家中收養咗兩隻流浪貓金金同銀銀為伴，相依命，「依家努力面對個病，冇放棄過，即使有壓力，但我幾獨立，好彩我係睇政府醫生，冇經濟負擔。」

一般人可能會對抑鬱症患者猛講「明白佢哋」，仟汶話其實係大忌，「同我哋講『你唔好諗咁唔開心嘢，明天會更好』或者『唔好唔開心』，我唔想開心咩，我好想日日都開心，咁我真係唔開心，點開心啫，我唔想去話啲朋友，佢哋出於好意，但用錯方法，唔可以怪佢哋。」仟汶有時怕朋友擔心，寧願收埋情緒，「唔呻唔喊，出到嚟咪開開心心，個個都會話，你咁大情大性，邊似抑鬱，我知身邊好多個係咁，其實咁先恐佈，佢對住人，同後面唔同一樣嘢。」

仟汶樂於分享抑鬱症病人嘅內心世界，不怕被標籤，「唔係要人同情，係想畀人知我突然喊原因，朋友可以喺電光火石間知道點去幫我。」患躁鬱症嘅盧凱彤早前墜樓身亡，仟汶感慨萬千：「睇到好心酸，我睇到呢單新聞時，我明佢，我唔知講乜，佢佢咁未必啱，但我明白。抑鬱症病人思維冇人明，最大問題啲人覺得點解我哋有勇氣去死，冇勇氣生存，唔係我有勇氣去死，亦唔係我冇勇氣生存，我冇力呀。」

仟汶自嘲「獨居老人」，身邊朋友都勸佢裝個平安鐘，「冇人喺身邊令你嗰剎那有嘢會做錯咗，但盡量都要靠自己，朋友冇得24小時，佢哋有家庭、工作同佢生活，除非身邊嗰個人，但都要搵食。我冇宗教信仰，又比較硬頸，我係明白道理，但有時會鬥氣。」仟汶慶幸家中收養咗兩隻流浪貓，解佢寂聊，佢話一歲多金金係之前踩單車時，路過水渠救了佢回家，銀銀則是收回來讓金金金有玩伴。

令仟汶多次走出死亡邊緣嘅，其實係老父，「我好緊張爸爸，佢係我命根，爸爸睇報紙睇我啲新聞，即使自己個女光脫脫，佢一句都冇問，只係叫我錫自己多啲。我好唔開心時會搬個老竇出嚟，如果我……我覺得爸爸會好傷心。不過唔開心上嚟，諗法唔會理，我同好多親朋戚友講，如果有一日我唔喺度，你哋將我火化，撒去公園得㗎喇，唔好搞咁多嘢，有乜就嚟公園同我傾偈，唔使搞骨灰龕，靈堂唔使破地獄，播歌同拎projector播我同朋友啲相。」

仟汶覺得香港人太繁忙趕，抑鬱症變成都巿病，佢好希望將正能量傳出去，「香港地誇張，手停口停，行得好快，我哋成人要人跟我哋step，應該我哋有問題，全世界冇一個地方似香港人咁黐線，係香港有問題，令好多人急趕。香港環境令情緒病人多咗，成日街上有人大嗌，梗有一個喺你左近，如果唔想咁，自己覺得有問題，要同好朋友傾吓，去睇醫生最好，只有自己幫到自己，當魔鬼打得你好緊要，希望天使最後會出嚟鬥贏佢，如果真係鬥唔贏，咁唯有接受。我想帶出訊息，有情緒病嘅朋友，希望你哋會面對，唔好話撞鬼撞邪，我好怕聽到呢啲，我唔抹煞，但科學少少，現實少少，不如面對啦。」仟汶話抑鬱病患者只需要身邊有朋友，「我哋需要唔多，坐身邊，唔使出聲，拍吓，有句說話叫『講多錯多』，等佢哋明開心同唔開心都有朋友一齊已好足夠，大家都努力，加油。」

採訪：比華利
攝影：陳俊強
攝錄：廖達燊 林德雄
場地：The Stadium（CWB）