告別38年賓主關係 約滿有新方向？傳Do姐鄭裕玲或離巢TVB

據傳媒報導，TVB「標誌人物」之一嘅Do姐鄭裕玲，考慮約滿後唔再續約，告別38年賓主關係。

9月踏入65歲嘅Do姐，1975年入行時效力佳視，後來佳視執笠，Do姐喺「六嬸」方逸華邀請下轉投TVB，從此演藝事業扶搖直上，先後為劇集《網中人》、《呂四娘》、《流氓大亨》等出任女主角。後來Do姐離開TVB轉攻影壇，更因為片約不斷而被稱為「鄭九組」，90年代初移民加拿大，1992年回流重返TVB。回巢嘅Do姐主要擔任主持及大show司儀工作，2000年罕有地為處境劇《男親女愛》做女主角，收視最高見50點仲拎埋視后。2011年起Do姐為商台開咪主持《口水多過浪花》，吸納唔少年青fans。

據報導指Do姐希望展開新生活，於是考慮告別TVB，但未知之後會係告別電視圈，定係會同其他平台合作，亦未知商台嘅節目會唔會有改動。

之前Do姐喺節目訪問過「隔離台」ViuTV嘅MIRROR同ERROR，亦有去捧場睇MIRROR演唱會，唔知日後有冇機會喺第度見到Do姐上電視？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！