【離婚定分手】爆阿仔06年西雅圖結婚 夏春秋讚江美儀﹕幾好㗎

分手兩年，江美儀近日突然自爆已回復單身，與吳君如細佬吳君祥結束11年情。不過，今日有報道指君祥爸爸夏春秋《冬叔》爆料，話兩人於2006年喺西雅圖註冊結婚，自己都係一、兩個月前先知道阿仔同新抱分手。

江美儀今日接受傳媒訪問時否認曾結婚，佢話﹕「無呀，冬叔搞錯咗啦。」但記者就質疑有埋西雅圖，好難搞錯喎？美儀再解釋﹕「我哋當年一齊去探我屋企人。」

今日《蘋果》亦有問番冬叔，佢承認係自己搞錯：「嗰陣我喺多倫多住，唔係同個仔一齊住，好多時佢哋行動我都唔知架！佢嗰時識咗美儀，我就叫佢快啲結婚啦！佢話好呀好呀：「我而家就去西雅圖結。」咁我話：「咁就好啦！」就係咁，我咪一直以為佢地係結咗囉！嗰陣佢地又冇儀式又冇擺酒！我就係咁以為佢地當時註咗冊囉！」

對於佢地分手會否覺可惜？冬叔話：「咁梗係可惜啦！我地好似一家人咁，幾好㗎！上個月我生日，我都有叫美儀出嚟，佢同我另外一個新抱都生日，3個人一齊做生日，個仔都冇同我講佢地分左手。」

而美儀今日就喺ig上載一張抱住愛犬嘅相，發表分手宣言：「未來的日子，抱歉，不能繼續和你手牽手一起走下去了，但我相信在各自的路上有著我們互相的關心和鼓勵，將來必定會走更高更遠。謝謝也祝福你，Vincent! ❤#江美儀 #江美人 #吳君祥 #好好善待自己」。