【香港人歸屬感】港產科幻片《明日戰記》網民：希望為香港爭返口氣！

要睇大場面，大家嘅首選往往係荷里活億元巨製。之不過素來有「東方荷里活」之稱嘅香港，都終於推出自家科幻大片，講嘅就係日前正式預告片曝光嘅《明日戰記》。呢部港產片由做特技出身嘅新導演吳炫輝執導，幕前卡士就相當龐大，有古天樂、劉青雲、張家輝、劉嘉玲、姜皓文、謝君豪等等。有份主演嘅古天樂旗下間天下一電影，有份投資套戲。電影耗資高達4.5億港元，後期製作都執咗兩年有多，睇返預告嘅「成品」，真係可以用「世界級特技」嚟形容！

《明日戰記》嘅背景設定喺2055年，片中嘅地球已受到具攻擊性嘅外星異種藤蔓「潘朵拉」入侵，導致空氣、水源都受污染，香港自然受波及。而古天樂、劉青雲等人飾演嘅拯救隊，喺預告片入面勇闖被異種覆蓋嘅城市，上演連場火爆動作戲碼，片中嘅後末日城市「戰亂」面貌、角色著住機械戰鬥服嘅造型、從天而降嘅機械戰車等細節，視覺效果相當突出，唔講以為睇緊Marvel出品嗰類荷里活A級製作。

除咗以上嘅大場面之外，預告令人期待嘅伏筆仲有係一面老妝嘅張家輝，喺尾段霸氣登場，自稱代表「天幕」。呢場戲俾到觀眾好大懸念，似乎疑雲重重，張嘅角色係忠係奸仍然未揭盅。

荷里活大片有香港影子 港產科幻題材再出爐

睇故事大綱同預告片，筆者不禁諗起《天煞地球反擊戰》系列、《強戰世界》呢類美國製作，睇美國人同外星人大戰睇得多，而睇香港人上演科幻戰爭戲碼，真係好令人引頸以待！再者，香港本來就係唔少cyberpunk科幻作品嘅意念城市之一，好似《2020》、《攻殼機動隊》等作品入面嘅城市，都好有香港影子，宜家香港自己拍番科幻題材，可以話係合適不過！中國科幻片《流浪地球》令觀眾重新審視華語科幻片，相信《明日戰記》推出之時都會備受矚目。

網民：CG做得好，希望為香港爭返一口氣

好多網民睇完預告之後都給予好評，有人話預告片呈現嘅係香港熟悉嘅環境，而土生土長香港人睇會好有歸屬感。亦有人大讚預告入面嘅CG做得好，力挺香港電影人好勁，希望套戲可以為香港爭返一口氣，尤其係香港從來無認認真真有套科幻大片，係時候要有突破。唔少人都話好想套戲快啲上畫，講明會買戲飛入場支持港產片，冀望電影可以大收旺場。

預告片仲未講電影正式幾時上映，筆者真係希望可以盡快睇到(如果暑假有就好)，最好可以喺IMAX巨幕下睇呢場港產科幻巨戰！

來源：天下一電影專頁

相關字：

明日戰記 港產科幻片 港產片 古天樂 劉青雲 劉嘉玲 姜皓文 天下一 荷里活 cyberpunk