雅虎香港新聞 【3點3下午茶】$30樓下有咩選擇？
3點3下午茶時間！放完長假仲未回魂？不如叫個下午茶叉叉電，等自己refresh下！要搵性價比超值嘅下午茶，唔貴又多嘢食嘅，又只得$30budget？放心，小編深明大家需要，幫你吔搵左多間快餐店及連鎖餐廳嘅下午茶抵食套餐，最平嘅$16就有得食，最貴嘅都唔超過$30，立即睇睇有咩選擇！
3點3下午茶 $30樓下有咩選擇？
1. 麥當勞：$16有飽食有嘢飲 （抵食度：★★★★★）
被大家評為超級勁抵嘅麥當勞「A+B下午茶餐」，有漢堡飽又有嘢飲，都只係售$16。「A區」嘅選擇都幾唔錯，有好受歡迎嘅豬柳蛋漢堡及魚柳飽，「B區」就有汽水或都凍奶茶及咖啡，唔飲嘢想食雪糕又有新地揀。簡直係超值！
———–
2. 吉野家：$20有飯有湯有嘢飲（抵食度：★★★★★）
中午食得少，到3點3仲係肚餓，想搵飯食？啱啦！吉野家嘅下午茶餐絕對滿足到你。迷你牛肉飯再加上小食帶子裙邊，唔止咁，仲有埋湯飲兼汽水，都只係$20。$20有4樣嘢，呢個下午茶嘅性價比絕對唔輸蝕得過麥當勞的「A+B下午茶餐」。
———–
3. 大家樂：炸髀再加紅豆冰茶餐$25就有得食（抵食度：★★★★）
下午茶食件炸髀再加杯紅豆冰，唔一定要茶餐廳先食到嘅。大家樂嘅期間限定下午茶套餐，只係$25就可以嘆到炸髀以及大大粒紅豆冰，而家天氣熱熱地，飲返杯紅豆冰消消暑真係一樂也。
———–
4. 南記粉麵：$26食到招牌河仲有可樂送（抵食度：★★★★）
平時要$31先食到嘅招牌河，下午茶只要$26就食到，兼夾送埋嘢飲。想再平啲，亦有$20選擇，不過就冇粉麵食，$20可以揀單餸或雙餸再加埋生菜，再包一杯飲品。如果食左個好豐盛嘅早餐，晏晝唔似好肚餓，等到兩點半再去買碗招牌河食，都不失為一個好選擇。
———-
5. KFC：茶餐滋味盒$26有飯有薯蓉有炸脾（抵食度：★★★★★）
KFC嘅茶餐滋味盒，小編最近都有食過，已經由$24加到去$26，呢張相應該仲未update，不過唔緊要，雖然價錢變左，但食物就冇變，每份滋味盒都有3樣嘢食加一杯飲品，唔鍾意飲可樂又可以轉熱蜜糖綠茶。每份滋味盒組合都幾全面，有萄撻、有飯又有香辣雞翼，雖然細細份，但平時KFC一個餐最低消費都3、40蚊一個，呢個滋味盒絕對超值。
———-
6. 大快活：$27有麵有多士再加條腸仲配嘢飲（抵食度：★★★★★）
大快活呢個精選茶餐，齋睇圖已經夠晒豐富，有粉麵有奶醬多，仲有一條珍寶腸兼夾包埋一杯飲品，真係可以當lunch食，未食lunch又肚餓嘅，食呢個餐肯定夠晒飽，加上價錢又抵，只係$27，抵過中午叫個飯餐食！
———-
7. 一粥麵：細蓉/紫菜魚皮餃湯麵加多杯紅豆冰只係$29（抵食度：★★★）
一粥麵下午茶時段，細蓉或者紫菜魚皮餃湯麵加多杯紅豆冰都只係$29，想食港式下午茶嘅口痕友，呢個下午茶絕對啱晒你！不過就唔知優惠幾時完，想食嘅朋友記住留意返餐廳最新資訊。
＝＝＝＝＝＝＝
雅虎於本頁中的角色只是為你提供資訊及商戶連結，而並非買賣一方或其代表或代理。所有資料根據連結內商戶直接提供為準，商戶並可能隨時更改。所有買賣均由用戶及商戶雙方自行負責。
「Yahoo著數」現已推出，我哋將會為你搜羅每日超市情報，話你知最新購買飲食嘅著數消息、免費或折扣優惠，幫你慳錢慳時間。
想知仲有咩最筍嘅優惠著數？快啲禁入嚟睇下啦！：https://yjetso.myguide.hk
歡迎提供優惠情報，情報一經採用，將有機會免費獲得Yahoo購物券乙張。快啲同我哋一齊搜羅全港優惠著數喇！
