不捨義氣仔女 楊千嬅唱到除鞋

楊千嬅一連兩場音樂會前晚結束，面對網民瘋狂狙擊，她處之泰然，而且情緒高漲得唱到脫掉高踭鞋。騷後她自誇EQ達神級，會面對及消化壓力，並指粉絲是其止痛藥水。

《楊千嬅 B minor 音樂會2022》前晚舉行尾場演出，方力申、郭偉亮與太太葉佩雯、吳若希與老公等捧場，千嬅父母、老公丁子高及兒子Torres亦連續兩晚到場支持。而《多功能老婆》團隊有陳煒孖老公、朱晨麗及黃浩然，千嬅看到他們時甚為興奮，陳煒與朱朱即向她派心心。

千嬅坦言不知何時再開騷，所以每次都拚命做，及後更數度哽咽，又向粉絲派定心丸：「我好好，大家唔使擔心我。」之後她提到爸爸時淚如泉湧，指感受到父母擔心她又不敢問的心情，承諾會繼續努力做好自己，並指歌迷的掌聲特別有意義，會牢記這兩場演出。

感恩有私伙「止痛藥水」

Encore環節，千嬅突然落台與粉絲互動，觀眾即蜂擁上前，她大為感動：「好多好熟悉嘅臉孔，好唔捨得你哋，好掛住你哋！你哋有義氣，冇漏低我！」演出原定以《楊千嬅》一曲作結，惟完騷亮燈後粉絲仍不願離場，更高呼Encore，千嬅終再度亮相，笑指粉絲是真愛，更索性脫下高踭鞋坐在台上，對着粉絲高呼：「你哋就係我支止痛藥水，I love you！」之後宣告音樂會正式結束。

千嬅完騷後受訪，坦言今次開騷百感交集：「一路都想返嚟開騷，因為疫情取消咗其實都唔係壞事，可能自己未準備好，咪畀心機練多啲嘢。」對於外間輿論，她表示：「決定返嚟開騷嘅時候已經調節好心態，真心好想唱歌，嗰啲唔係重點，壓力留番喺表演水準上。」對於在台上提及爸爸時情緒激動，她說：「佢擔心我承受輿論壓力，但我嘅EQ已經係神級，基本消化能力係有。做仔女最緊要父母開心同健康，呢幾年體會到，除咗生死冇咩咁介意。」面對網民的負面聲音，她處之泰然，表示不能夠只擁抱愛你的人，亦要接納挑戰自己的人。談及唱到除鞋，是否再度有喜？她大笑不已：「我關節痛啫！尋日跑跑吓Chok到關節，所以先除鞋。」並指待完成手頭工作後將休息幾個月，準備出埠旅行及回歸家庭。