中年好聲音3丨肥媽逢人派燈 伍仲衡挑機寸爆火藥味濃：冇熄過㗎佢盞燈

由車婉婉擔任主持嘅TVB音樂選秀節目《中年好聲音3》除咗喺香港召集一眾唱得之人，仲新增新馬和大灣區兩個賽區，於各自賽區進行比拼後再角逐香港賽區嘅15個名額。前日（1日）播出《中年好聲音3之決戰新馬》，率先集結10位參賽者，部分參賽者更係人生首度嚟香港。評審團之一嘅肥媽（Maria Cordero）分別對10位參賽者都有撳燈，而成集比賽中，評判共派出二十七盞燈，肥媽幾乎佔三分之一，因而惹起熱議。

《中年好聲音3》評審團包括肥媽、張佳添、周國豐、伍仲衡和曾路得，初賽賽制一如以往以盲選形式評分，不過參賽者是次一開始演唱嗰陣須站於布幕後以剪影形式唱歌，直至有評審撳燈時則會啟動輸送帶，曝光其真面目，獲3燈以上有機會晉級，獲5燈即可直接晉級。喺播出嘅第一集中，10位參賽者實力懸殊，部分更走音，其中一位新加坡演員莫健發獻唱《得不到的愛情》時就被伍仲衡笑指對方唱嗰個係打思噎版本。不過，肥媽就逢人派燈，而且幾乎每位開聲兩三句已撳燈，一班網民直言其實肥媽係咪想畀觀眾睇晒10位參賽者個樣所以撳燈：「佢盞燈冇熄過㗎」、「聽第一句就按燈，我都真係唔知佢想點」、「好心個setting就，一半冇人撳都會出樣啦，搞到而家好似要辛苦肥媽撳掣」、「肥媽只要有出場就比」、「肥媽幫大家解開迷團」、「肥媽唔會令你失望」、「肥媽個工作係咪show班人個樣」及「肥媽成日搶頭淡湯」等等。

反觀，伍仲衡撳燈就相當嚴格，全程僅撳得一次燈。王鄭浚仁演唱《同花順》轉音同震音都十分流暢，成功令伍仲衡畀咗盞燈佢，成為節目嘅第一個五燈選手，伍仲衡仲挑機肥媽：「所以值得攞嘅我係會畀（燈）嘅，都畀啲掌聲肥媽先啦，冇熄過㗎佢盞燈，唔關我事，可以唔使熄啊。」，肥媽則霸氣企起身氣反擊：「關你咩事啫？人哋打低咁多人，嚟到呢度，唔值一盞燈咩？」火藥味十足，有網民就話睇佢哋兩個互串都幾好睇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！