今期流行!你是我的心愛甜品 全港6大Apple Pie推介

今期最紅嘅美食,非APPLE PIE 蘋果批莫屬啦~ 唔知蘋果批是咪你的心愛甜品呢?兒登MV同款嘅蘋果批更立馬被買斷貨!而除咗好多西餐廳嘅甜品都有蘋果批供應之外,香港開下開下,都有唔少蘋果批專賣店㗎。

RAPL 144層酥皮日本過江龍

 圖:soya1314、Gingerbunny
圖:soya1314、Gingerbunny

2019年秋季抵港嘅呢間日本過江龍,喺日本曾創下一個月賣50萬個蘋果批嘅紀錄。位於銅鑼灣嘅專門店,設有現場烤焗,即場可以食到新鮮出爐嘅蘋果批,暖笠笠特別好食。佢哋嘅蘋果批製作認真嚴謹,有144層酥皮,內餡嘅青森蘋果粒亦指定為2cm方粒標準,焗完一次後注入現打新鮮吉士醬再焗多次,難怪酥皮咁酥脆,陣陣牛油香之餘,同清甜juicy又爽口嘅蘋果亦能做到平衡。

Mille Mele Tokyo 世一蘋果批?

 圖:food_photography、sleepingcouplehk
圖:food_photography、sleepingcouplehk

同樣嚟自日本(橫濱)嘅蘋果批店,喺上年年中登陸,而創辨人則係嚟自意大利北部傳統料理世家,所以雖然呢間舖係由日本傳入,但佢哋嘅蘋果批製法,卻係跟意大利傳統嗰套嘅。選用香料蜜餞富士蘋果,切厚片後再加入多種秘製香料慢煮過,先至連同搽上雲呢嗱糖漿嘅批皮一齊焗。唧入由日本空運直送嘅吉士醬後再焗多次,最後會唧埋輕盈嘅豆乳忌廉。蘋果批餅皮鬆脆帶香甜,即使吉士醬較甜,但果餡蘋果大大粒,味道酸甜,都可以中和返嘅。

Cocolo Tokyo Cake Factory 日本空運直送

圖:karin_toru、cherryiseating
圖:karin_toru、cherryiseating

呢間都係由日本(東京池袋)引入嘅糕餅店,暫時喺香港有4間分店。唔同嘅係佢哋嘅蘋果批喺日本全人手製作,再空運直送到港,佢哋嘅蘋果批皮相比以上兩間就冇咁厚,口感香甜鬆脆。而蘋果肉則選用青森蘋果粒製作,甜多過酸,而且份量都幾多,忌廉就唔算話好甜,食完唔會有太膩嘅感覺。(三間日本過江龍嚟講,呢間係最平嗰間呀)

Tai Tai Pie Pies 大人版蘋果批

 圖:餐廳Facebook
圖:餐廳Facebook

至於美式蘋果批嘅代表,則有呢間位於金鐘嘅專門店。成個樣都唔同嘅蘋果批,批底使用美國麵粉製作,亦唔吝嗇咁用咗多款唔同品種嘅蘋果混合焗製。不過可能始終都係偏美國人嘅口味,呢度嘅蘋果批就相對較甜身,肉桂味亦較突出。如果想試啲唔同啲嘅,可以諗諗「大人版」嘅Drunken Apple Crumble Pie,製作時加入咗威士忌㗎。

Butter 美式濃甜版

圖:FeivouriteFood、RheaChim
圖:FeivouriteFood、RheaChim

呢間都係美式糕餅店,蘋果批嘅賣相相當吸引,一眼就望到佢哋用咗超多蘋果,粒粒都係大大粒嘅𠻹,好鬼足料。餅皮係香脆嘅,食落有淡淡肉桂香,但都真係略為甜咗少少。

麥當勞 冰火交融版

當然唔少得一講起蘋果批,大家就會諗起嘅呢間快餐店啦。最近趁住Edan推出新歌,佢哋亦推出新地蘋果脆,熱辣辣嘅蘋果批插喺凍冰冰嘅雲呢嗱新地中,冰火交融,買兩杯仲有機會獲得2張「E」卡𠻹,祝爵屎們好運啦。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能