住公屋，未必一定窮

示威場合互罵時，有人傳出「你住公屋有甚麼地位」金句，即時掀起網民熱話。咁住公屋究竟有無地位呢？

要拆解此疑難，可以從兩路入手。首先是公屋戶的上流力，住公屋唔代表無錢景，你睇公屋出咗幾多成功人士兼隱世富豪？就以南區公屋王華富邨為例，除了大家熟悉I.T.集團老細沈家偉，還有殿堂級編劇、導演韋家輝，以及星級DJ小儀。位置優越的勵德邨，則出了林珊珊、林海峰及林曉峰一門三傑。

新界區不得不提馬鞍山恆安邨，皆因除了天后容祖兒（下圖），還有可以在國慶大典亮相的國民級藝人王祖藍，單是一個祖藍，就足以證明公屋出身同樣可以地位不非凡。

第二就係部份富戶住公屋，只係一種態度，唔代表佢窮。住公屋只係代表佢理財之道，除笨有精；公屋隱世富豪多係公開秘密，單係今年就有兩單觸目新聞。第一單係今年四月天水圍天恆邨一住戶隱瞞擁有四個總值逾千萬物業，被判160小時社會服務令；第二單係今年六月何文田愛民邨兩名住戶，隱瞞各自擁有一個香港物業一半業權，家庭總資產達675萬元，被判罰款四萬元及三萬元。這類新聞幾乎年年都有，可見低調地擁有富豪地位的公屋戶，總有一位在你左近。事實上「你住公屋有甚麼地位」一出，已有公屋戶網上自爆間接有兩層樓喺手，唔係個個都要講你知云云。

最後真係唔好睇少公屋嘅「雪球效應」，公屋戶引人羨慕之處，就係可以專享按部就班樓換樓升呢機制。公屋戶既可以用綠表抽一手居屋，亦可以用綠表免補地價買二手居屋，再以居屋為跳板，就可以晉身私樓業主之列。過去曾有成功入手港島東居屋的公屋戶，就憑這個決定令身家突破九百萬，其實動輒要儲過百萬首期的中產人士，就好似要花好多力氣去追巴士，而公屋升呢戶，只係計啱時間，輕鬆上車。

公屋同私樓都有貧窮戶，但從有時你問中產人士，佢同你講：「早知果時都去申請公屋啦」你就知道，住公屋喺好多人心目中，地位真係唔低呢～～

===============

財經精選資訊網站「中環街市」 臉書粉絲頁