余黎青萍指電視電影色情暴力元素泛濫 馮德倫出PO反擊

監警會委員余黎青萍前日（20 日）喺監警會會議上，表示關注性暴力及家暴等問題，認為電視及電影色情暴力元素非常泛濫，令市民吸收大量色情暴力元素，虐兒個案亦有所增加。余黎青萍更點名批評TVB《香港小姐競選》，質疑港姐佳麗點解要著住泳裝答問題：「少布到不得了」，「答問題使唔使要喺冷氣房裏面，對住曾志偉嗰啲咁樣，瞪大眼望到實，點解要著三點式答問題呢？我真係唔明。」

除咗TVB發出聲明強烈譴責之外，事件亦引起唔少人關注，當中包括電影人馮德倫，佢喺IG上載韓國電影《無聲吶喊》海報並發文反擊：「虐兒問題嚴重當然要重視，保護兒童是必要。把責任推到香港影視，請拿出證據，有統計嗎？不會是社會壓力，貧窮問題… 嗎？ 電影暴力氾濫？香港電影何來的氾濫？一年不到幾十部。有電影之前世界沒有虐兒問題嗎？ 電影從來都反映社會問題，好的電影還會帶出阻嚇作用。有看過無聲吶喊，PLATOON 嗎？香港影視行業已經非常難做，還在落井下石，要擦存在感麻煩去其他地方」唔少網民都紛紛留言表示支持，例如「其實係好可笑，無啦啦用電影做 scapegoat，但有時要用電影去宣傳時就講到電影好重要，不如啲無謂人俾電影業真係專心自己發展啦」、「講得好呀！」、「長津湖開晒槍又剩，算唔算暴力？」、「導致香港虐兒問題嘅原因其實有很多 : 抗疫政策，經濟環境，原生家庭影響... 如果只係將一切罪名加諸係電影業之上，恐怕唔單止冇對症下藥，仲無辜扼殺咗一眾電影從業員嘅努力 香港電影業已經好難行，希望大家唔好隨便搵電影嚟做藉口，迴避問題癥結」、「對啲無稽嘅言論唔使咁嬲」及「有問題叫提出問題嘅人收聲從來都係廢嘅當權者一貫做法！好采（彩）仲有人繼續發聲！」等等。

另外，陶傑及已經離巢TVB嘅歐陽偉豪（Ben Sir）亦有就港姐泳裝「少布到不得了」出PO，同樣得到唔少網民留言支持。

余黎青萍噚日傍晚發聲明：「席上警方闡釋保護易受傷害證人的措施，並將與列出的相關部門合作。就此，本人認為尚有其他部門。於是提出電視和電影帶有不少色情和暴力的元素，表示合作的相關部門實應包括電檢當局，須嚴格檢視影視指引。本人終結提出，家長須關注子女情況。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！