《使徒行者2》播咗兩集已經死咁多人 會唔會超越《同盟》成為今年最多人死劇集？

做臥底果然好危險！《使徒行者2》首播已經炸死咗5個臥底（洪永城、古明華、連詩雅、何雁詩及楊潮凱），噚晚播出第二集繼續死多幾個，當中包括主角級人物「歡喜嫂」陳煒和「黎Sir」張兆輝。連佢哋都只係用嚟做配襯，睇得出無綫今次認真落重本。

噚晚故事講到黎Sir（張兆輝飾）發現警隊有黑警，想將臥底資料偷走然後交畀好友卓Sir（苗僑偉飾）。點知途中被幪面殺手狙擊，結果壯烈犧牲。不過好彩被卓Sir遇到黎Sir嘅臥底鄭淑梅（黃翠如飾）。

而最令人期待嘅「歡喜歌」許紹雄噚晚亦終於登場！由於陳豪飾演嘅Victor勸退老豆成為長興新龍頭，為咗掌管社團就設局殺社團老叔父羅漢，之後再想殺歡喜哥。但係身為臥底嘅歡喜哥因為仔細老婆嫩，所以向Handler「程Sir」要求復職，但係就被要求要埋到Victor身先有機。點知兩人見面嘅時候就被黑幫伏擊，程Sir為救歡喜哥又被射殺。

其後歡喜嫂喺逃走嘅時候又俾黑幫斬死，臨死前要求老公要保持笑到見牙唔見眼，唔怪得知佢以後就算殺人都笑啦！巧驚驚呀～

兩集就已經死咗咁多人，分分鐘有機會死得多過公認死得人多嘅《同盟》，有機會取代《同盟》成為2017年最多人死的劇集。不如大家除咗估邊個係「Big Boss」之餘，都可以順便競猜吓今晚嗰集又會死多幾多個喎！