【個片頭曲有聲架！】《體育世界》將停播 細數歷代主持

由1980年9月開始播出嘅無綫體育節目《體育世界》，每一集都為大家報道體壇最新動態、運動賽事及訪問運動員等等。播映至今已經38年歷史，已經儲落一班粉絲每個星期坐定定收睇，但係有指《體育世界》喺今個星期六播埋最後一集就會停播。另外，MyTV Super體育台就會做到8月15號。繼日前TVBI裁員後，有傳李寶安要余詠珊炒100人，噚晚就有消息指無綫解散體育組，將原本30人嘅體育組，炒淨5個人，呢5個人就會撥入新聞部，而無綫行政總裁李寶安已經承認體育組會解散。

《體育世界》最令人有深刻回憶嘅一定係佢嘅經典片頭曲，只要一聽到就會認得。不過節目播出咁耐，唔多唔少都會有轉變，多年嚟有唔少藝人都做過節目主持人，由第一代嘅陳秀珠、陳復生、陳敏兒及林嘉華，去到而家嘅余德承、李思雅、蔡曉慧及黃庭鋒。期間亦有韓毓霞、鍾志光、潘宗明、李靄璣（林奕匡老婆）、陳約臨、楊天經等人做過主持，但當中最經典嘅主持一定係有「體壇譚玉瑛」之稱嘅韓毓霞（Wendy）。見到Wendy好自然就會諗起《體育世界》，因為佢由1985年開始做《體育世界》主持，做咗足足30幾年。

除咗主持人嘅變動之外，其實節目播出嘅時間都曾經多次變動及縮短。例如節目一向係喺星期六下晝播出，但上年1月開始節目時間由下午2點3提前至中午12點播出；播放時間亦有06年嘅1個鐘頭15分鐘，縮短到而家嘅30分鐘。

呢個老牌體育節目要停播，相信唔少觀眾都會感到錯愕，如果唔捨得嘅話，聽日記得睇埋最後一集喇！